قضبان حديد

قضبان حديد
يجرى عليها قطر العمر
ايام تفوت....
سنين تمر....
قدامنا تجرى الدنيا
واحنا محللك سر...
سكة طويلة
و احنا مش داريين
لا عرفنا جينا منين
ولا حتى فين رايحيين
نرتاح يومين....
نشقى سنين....
نضحك وكل قلب
ما بين ضلوعه حزين
لكننا عايشيين......
يدخل علينا الليل
تنسى عنينا النوم
نسهر نلقى السما
هربت منها النجوم
و قمرها يستخبى
منّا ورا الغيوم
و تزيد همومنا هموم....

عايشين احنا كده
راضيين..مبنشتكيش
مهما نحس بأمان
الخوف مبينتهيش
من يوم يجى علينا
نلقى القضبان مفيش
و السكة تنتهى
واحنا نسينا نعيش........

بلياتشو

بلياتشو انا
دى مهنتى
سعادتكوا....
هى مهمتى
مرسومة ضحكة
على شفتى
و جوه منى الف اه
بلياتشو انا
فى سيرك الحياة
غريق و نفسى
فى طوق نجاة
بصرخ و اقول
ساعدونى...لكن
صوتى فى بحر الدنيا تاه
بلياتشو اه
لكن حزين
و دمعى يملا
الف عين
ده القلب موجوع
من سنين
و مين يحس
اللى جراله....
بلياتشو انا
و مين دارى ؟؟
باللى فى قلبى متدارى
على ضحكتى
الناس تضحك
وابكى انا
على حالى..........