مولانا

مولانا العارف بالعاشقين

مولانا العارف بالزاهدين

مولانا العارف بالثورة

وبالقُدرة

وبالسُخرة

وبالعورة..ف هتاف الحق

مولانا الكاشف للمخفى

ومدارى الظاهر للعالمين

بعد السلام،

قاصدينك وبنطلب عون

قد فاض الكيل

واحنا بنصبر

قد طال الليل 

واحنا بنصبر

قد زاد الظلم

وبقى عادة

والموضة

العمة على بيادة

واحنا بنصبر

ولحد فى مرة لقينا الصبر

لم عزاله، وعياله وهَج !

مولانا الصافى المتصافى

ازاى نفضل بثبات وافى 

عالحق، ونهرب م الألوان ؟

وسؤالنا ماهوش عن ضعف إيمان

لكن فيه قلوب عايزة اطمئنان

مولانا الشمس فى ضلمة كون

فى زمان الزيف

سدوم وعمورة 

بقوا السلاطين !!

وبيتحاربوا لأجل العفة

برايات الوطنية والدين !!

مولانا الحاضر فين مانكون

مع إن دمانا بذات اللون

مطلوب نوزنها وبالكيلو

ونغض الطرف عن اللى أقل

لأجل ما نمحى بينا الفُرقة !!

مولانا العارف بالملكوت

القابض على أسباب الموت

الطف بينا،

يا بستر يا كشف يريحنا

ده فراق الرفقا بيدبحنا

والضعف أهه سارح فى قلوبنا

وكإنه جينات

الطف بينا،

محاوطنا ديابة ودبابة

وعساكر محتلة الغابة

وتعالب ضاحكة على غلابة

والدم مزاد

الطف بينا،

ماحناش خايفين من لحظة موت

ولا صوت الطلقة لما تفوت

خايفين من يوم نلاقينا كروت

فى إيدين بهوات

مولانا العارف بالملكوت

الطف بينا،

من غدر الخاين وسطينا

ومن الشرير نجينا

ورجال الكرسى والكهنوت

مولانا العارف بالملكوت

مابقاش فيه كلام

فسلامنا ختام

للى سبقنا فى دخول دارك

واستغنى عن الدنيا وزارك

ومايمنعناش من زيارتكم

غير بس الدور

#عن

من وحى حاجات كتير

وناس أكتر...

-المفتتح-

#عن

كلفَـتَّـك جوا الأحلام

على أخر الليل

علشان تدفا

 #عن

طيف بهتان

بتطارده..ولو مهما تقرب 

مابتلحقهوش

#عن

كام نُقرة فى طريق النور

وعشان ماتقعش فى وسطيهم

محتاجلك نور !

#عن

نظرة وضحكة وكام كلمة

وشموس ونايات على كام غنوة

فالحبكة تزيد

وتقرب فيك حتى تفارق

فى نزول التتر

#عن

اشتياقك للقلم

ولبكرة

والهروب م الذكرى

ولروحك اللى بتتسرسب

مع كل اللى بيخرجوا

ومايرجعوش

#عن

الفكرة اللى بتطردها

فبتطاردك

#عن

زهد الكتب والمكتبات

والقراية والغُنا

وسط البلد 

والفاترينات

واللى فات..وانتوا وأنا

-الكريشندو-

#عن

كام قصيدة انتهوا

قبل البداية بكلمتين

#عن

كلمتين فى البداية

قلتهم..فانتهوا

-القفلة-

#عن

السجن

اللى بتهرب منه..ليه

#عن

البراح

اللى بتدور عليه ورا سور السجن

#عن

الهروب

اللى نفسك فيه

#عن

نَفسَك

اللى بدأت تتعرف عليها جديد

#عن

المعرفة

اللى ودتك للشك

#عن 

الشك

اللى عَلِّم عليك توهان

#عن

التوهان

السجن، البراح، الهروب

نفسَك، المعرفة والشك

#عن

اليقين

رسائل بعلم الوصول

ملحوظة :

النصوص -التالى ذكرها- ما هى إلا خربشات شعرية متصلة حيناً، منفصلة فى معظم الأحيان..ولذلك وجب التنويه

- مقدمة -
وجنانى فى عشقك..عقل
والعشق بعقل..جنون

"حقيقة علمية"

-1-
وبرغم إنك،
البطلة فى معظم أحلامى
وعيونك علطول قدامى
بس أنا بشتاق

-2-
ومش عارف
وأحياناً تكون عارف
وأحياناً تتوه الصورة م البراويز
وتتلون وتتبدِل
وتتغير وتتقفِل
وبالترابيس
وتيجى تغيظ
عشان واقفة قصاد عينك
لكنك برضه مش شايف
ومش عارف !

-3-
اسمحيلى،
فى كل لحظة أكون معاكى
إنى أتوب عمّن سواكى

-4-
إيه معنى الضحكة على الإفيه
لو مش مِنِك ؟
وأشيل فى هموم الدنيا دى ليه
لو مش عَنِك ؟
وسواكِ إنتِ
البسمة لمين ؟
ولمين أشتاق وأحن سنين ؟
ولمين أسهر،
وأدوق النار ؟
ولمين أشكى،
وأحكى الأسرار ؟
ولمين أعمل مليون حاجة
ولمين الدنيا دى محتاجة
غيرك إنتِ ؟؟
وبرغم إنى،
مُتأكد إنه ماهوش ذنبك
لكن برضه،
إيه المعنى العُمر بكل مافيه
لو مش جنبِك ؟

-5-
وغُربتى
فى عيونك -إنتِ- المُعجزات
هى الوطن

-7-
مانيش قادر
أبطل حُبك الإدمان
يا عاقلة وبتزيدينى جنان
يا جمعانا فى عُقد قلوب
فى حُبك ليه أبات مغلوب
ومش كسبان ؟

-8-
"..........."
مش لاقى فى حدود اللُغة
ولا حتى فى جديد الكلام
شئ يَصلُح وصفك إنتِ بيه
فعشان كده،
املى مكان تلك النُقط
باللى إنتِ نِفسِك تسمعيه

-9-
ونُقصانك،
فى حد ذاته ده الكمال
زى المِسا،
قلة ضياه زايداه جمال

-10-
وليت وجهى شطر عيونك
ونويت الفرض
فياريتك لو تقبلى قلبى
وتزكى بقلبك قرابينه
فى طابور العرض

-11-
وسط الدايرة
كل أما تقرب م المركز
الشُوف بيقل
جرب تبعد
وتوسع كادر الشُوف لعينيك
هتلاقى الحل

-12-
عند اكتمال العشق بالمعشوق،
أقم الصلاة
واخشع أوى
وافرح -بما آتاك- أوى
وساعتها هاتدوق الحياة

-13-
كام مرة حاولت وماقدرتِش ؟
كام مرة حلمت وماوصلتِش ؟
كام وش فى قلبك أساميهم
نسيوك..ولكنك ما ناسيهم
كام ألف طريق عديت بيهم
وماطولتِش ؟

-14-
مع إن قلبك من إزاز
والطوب كتير
لساه برغم التحذيرات
قادر يطير

-15-
"هل لديك أقوالٌ أخرى ؟"
"يمكن..."

ازاى ؟

ما تقولى ازاى
بتدارى الجرح الساكن فيك ومابتدمعش ؟
ازاى بتفارق أحلامك ومابتودعش ؟
بسمة وشك وسط التوهان
قوة ولا ضعف
النور فى عينيك -رغم العتمة- ازاى ماخضعش !؟

قادر فعلاً ؟
متحمل زى مابيقولوا
ولا دى أوهام
مين قال الحزن -المِتسَكِّن- بيبان فى كلام ؟

بتعد الخطوة ف مشوارك
وبتتغرب !
بتدارى وتكتم أسرارك
وبتتسرب !
بتروح لبعيد
تهرب م العالم والأكوان
وتدارى الحزن ورا الألوان
ترسم ضحكة
بتخبى وراها شروخ روحك
وبتتعايش
وإن سألك حد على الأخبار
بتقول: "عايش.." !
عمال تهرب
من غربة، لغربة، لتغريبة
وشراعك مش لاقى المَرسَى
وتطَوِل وتزيد الغيبة
على أمل إنك تقدر تنسى
وتلف تدور
فالغربة تقَطَّع أوتارك
وتعود تانى
تبدأ م الأول مشوارك
وتدارى الحزن فبتلاقى
دربك يصعب
وتحط البسمة على شفايفك
ولا يوم تتعب
وتدور فى دواير مقفولة
بمليون مفتاح
وتعَوِد قلبك عالتوهة
فتعيش سواح
وبرغم إنك
مكسور وحزين
بتوزع ع الناس الفرحة
وتصحى أمل جوه التايهين
وبدون أسباب،
بتشيل الحمل على كتافك
وتدارى الآه
من ذكرى بتنخر فى ضلوعك
ووجعها حياة
والحمل تقيل
ويوماتى بيتقل وبيتقل
وبتتحمِل..
وقلوب بتفارقك وبترحل
ولا تتملمِل..
ماتقولى ازاى قادر تهرب ؟
وازاى قلبك..لساه مكَمِل !؟؟

Playlist

"أم العيال العِشَريّة"

حالة من العشق البهىّ
فبينما يتغنى الجميع بالمحبوبة الشابة، تلك المنطلقة بلا قيد
تغنى هو بمحبوبته "أم العيال"ـ
صاحبة السنين التى مضت والسنين التى لم يأذن الله لها بالمضى بعد
من تحملته وسنينه العجاف، وحملت أوجاعه بداخلها كما حملت "العيال"ـ
غنى لها كشاب عشرينى..فحبه حق
والحب الحق لا يشيخ وإن شاخت الأجساد..

عشرية - أحمد منيب

------------

"كل الحاجات حواليا تدور
زى الحيطان بتدارى النور
وقلبى من بعد الطيران
ماحيلته إلا جناح مكسور"

تلك الآثار المزمنة للتجربة
لا يُدركها سوى التائهون فى غياهب الذكريات

كل الحاجات - محمد منير

------------

"إنتى أنا وأنا إنتى
مهما كبرتى واتغيرتى
بعيونى إنتى الثابتة
يا مرايتى"

بعيداً عن الأحياء والجامدات وكل ماهو كائنٌ على هذه البسيطة
فقط ذلك الصفاء الفضى يصدُقك دوماً

مرايتى يا مرايتى - رشا رزق
من فيلم سكر بنات
------------

"وأول ماحُبك يقابلك..يسيبك
وأول ماحُبك يسيبك..تخاف"

بالرغم من تيقنك بانعدام جدوى ذلك الشعور المسمى بالخوف..إلا أنك لم تزل فاتحاً ذراعيك لتحتويه

تدّور وترجع - دينا الوديدى

------------

"تاه وسط الزحام
فَكَّر فى أبعد مكان
ينسى فيه اللى راح
واللى صار وكان"

ولازال البحث جارياً عن ذلك الـ "أبعد مكان"ـ

أبعد مكان - ماسكارا

------------

"والسمن سايح
سايح لفوق"

والأعين المتشحات بالحزن
ترى ما لا ترون

بيبه - شريهان
من فيلم عرق البلح

------------

"يمكن فيه طريق جديد
بينى وبينك
نحنا مش شايفينها"

يمكن..

يمكن لو - رشا رزق
من فيلم وهلأ لوين

Monologue

عارف..
أنا دايماً بتونس وحدى
وأتشاغل بيّا عن الدنيا

عارف..
بتمشى ساعات ويّا دماغى
وأفضل أحكيلها عن الأشواق
وأما أزهق..
أدخل ع السيما
وأحجز تذكرتى فى أخر صف
كما العشاق
وأضحك ع الإفيه البايخ
وبعلو الصوت
وعينيا تدمع وأتأثر
لو حد يموت
وأتضايق جداً..
من مشكلة مالهاش لازمة
وعشان الحبكة تكون أحلى
صبحت لازمة
وأتناقش بعدها مع نفسى
ازاى ده حصل ؟؟
واشمعنى الفيلم ده بالتحديد
مخلصش على نهاية سعيدة ؟
قال يعنى كده حاجة جديدة !
وأحاول أقنعها برأيى
تعند أكتر
فتحاول تقنعنى برأيى
فأعند أكتر
ولفاية مانرّوح بيتنا
بيكون ده الحال
وف آخر الليل كده نتصافى
وننام دايماً مرتاحى البال

عارف..
راح أقولك سرى المتخبى
"قول ماتخبيش"
كل دى تلاكيك
"علشان الحبكة تكون أحلى؟؟"
عشان أقدر أعيش



*المونولوج هو الحوار الداخلى أو حوار النفس

درجات المشنقة الثلاثة

-1-

سَبَّق يُمناه

وعيونه الهادية بتقتلهم

بالرغم إنها مليانة حياة

سَمَّى وكَبَّر

أتبع يُسراه

-2-

السما كانت هى القبلة

والقضا مكتوب

كما فرض أخير

وأداؤه وجوب

وَلّى بقلبه

-مع إن قيود إيده ورجله مقفولة تمام-

بص لقدام

شاف الصورة لأخر المشوار

فازداد صبراً

وأما اتبسم

ازدادوا ندوب

-3-

من فوق الفوق

اتجول نظره فى الأحياء

الحزن بيمسك تلابيبهم

وده بيت الداء

والدمع بحور

متصادرة بأمر من الأعداء

اتجول نظره ومن تانى

وزرع فيهم من صورته يقين

"النصر ده ضى"

"وإن مُت اليوم، فأنا موتى حياة للجيل الجاى"

"والاستسلام شئ مش مطروح"

"فيا إما النصر"

"يا إما الروح لخالقها تروح"

-خاتمة-

الحبل فى دايرة كان مجدول

والدايرة وصول

-وبرغم صعوبة هذا الدرب-

من بين سالِكيه ولا واحد تاه

أول ما اتفتحت تحته الأرض

سقط الجثمان

أما المُختار،،

فصعد لله

إلى شيخ المجاهدين..عُمر المُختار

نراك قريباً مع الصديقين والشهداء وسائر الرسل والأنبياء إن شاء الله

فوتو جراى

بُص ف مرايتك
عِد تجاعيد الوجع
كام شعرة بيضا
بيكسروا طيش الشباب
قلبك..وداب
والعلة كُتر الأسئلة
العين بتشتى بالدموع
فتزيد سواد الليل سطوع
أما الشموس..متأجلة
العقل..مجذوب الحنين
حاير وداير له سنين
يمكن تتوه المشكلة
إيه اللى فاضل ليك هنا ؟
إيه اللى فاضل ليك هنا بعد اللُقا..غير الفراق؟
كام ألف آه بيزلزلوا فيك السكون
أمل الجنون
وخيوط حياة متفككة على شكل توب
-كيف الهروب ؟-
والليل خلاص احتل كل الأزمنة

بُص ف مرايتك
عَدى تجاعيد الوجع
عَدى السواد والحيرة
ودموع الأنين
تلقى الفرح
متخبى فى إدراج السنين
تلقى الوشوش..من غير رتوش
صادقة بعيون
مليانة بالشوق والحنين
قناديل تضوى
تنهى حالة احتلال
-الليل لعمرك-
تِدى لشموسك مجال
تمحى المحال
تغزل خيوط قلبك على نول السعادة
وكل ما ده
تفك تجاعيدك زيادة
تعدى بيك الأزمنة
والأمكنة
تفرد جناحات الأمل
تملا عليك الكون هَنا
وإذا كنت فاكر دى النهاية
تميل عليك
وتقولك ابدأ..من هنا