احياناً !!!

الدنيا دى سيما كبيرة
و حياتى هى الفيلم
ولا ليها لقطة اخيرة
و لا ليها حتى اسم

احيانا تبقى دراما
ملهاش نهاية سعيدة
الجرح يزورنى ياما
و مفيش غير حاجة اكيدة
الغــدر زى ما هو
بس الوشوش جديدة

احيانا تبقى كوميديا
اضحـــــك...
و ضحكتى هادية
و الدمع يهرب منى
و نفسى تصبح راضية

احيانا يمكن اضحك
احيانا يمكن ابكى
يمكن احيانا ارضى
او حتى يمكن اشكى
يمكن افضل امشى
من غير اى اتجاه
لكن هيزيد فى قلبى
حبـــــى للحياه

بالألوان

هو انت ليه زعلان ؟؟
حزين مليان جراح
مكسور كده..دبلان
و العمر منك راح
مش لاقى ليك مكان
و الدنيا حواليك براح
و قلبك الغلبان
نفسه فى يوم يرتاح
فى عنيك الدنيا سودة
غدارة ملهاش امان
و مفيش حتى فى قلبك
للحــلم اى مكــان
طب جرب مرة تضحك
و تشوفها بالالوان
و كمان انسى جرحك
و غيّـر العنــوان
الدنيا هتبقى ملكك
و هتقدر ع الزمان
لو تحلم تلقى حلمك
يصبح حقيقة كمان
بس انت الاول اضحك
و افتكر انك انسان

قرب يا بيه

قربى يا هانم
قرب يا بيه
عندنا تشكيلة قلوب
بس ايـــه...
نقى و شوف
القلب اللى عاجبك
و بطرف ايدك
شاور عليه....
فى عندنا
قلب فاضى
و قلب قاسى
بس هادى
و قلب تعبان
بس راضى
و كله عادى.....
و فى كمان
قلب شايب
قبل الأوان
و قلب ناسى
طعم الامان
عايش حياته
ورا البيبان
خايف...
مدارياه الحيطان
و الكل اهه
ع الرف باين
قرب يا بيه
اوزن و عاين
نقى اللى عاجبك
بس التمن
مش راح يكون
حسب الميزان....