نسمة هوا

نسمة هوا عدت
مالت عليا و هدت
ندهت انا..ردت
ردت عليا بهمسة
و لقلبى لمست لمسة
صحتلى فيه الحلم
مع انه اخضر لسه...

مالت عليا و قالت
خلى الجناح مفرود
اعلى لفوق و طير
دى سماك ملهاش حدود
و اياك تفضل اسير
اكسر كل القيود
ده حلمك لو صغير
بأيديك يهد سدود
و لو تضيق عليك
خلى الامل موجود
ده الليل مهما يطول
الصبح لازم يعود

وشوش

جربت تمشى فى الشوارع
تمشى تقلب فى الوشوش
و تشوف كده ايه اللى باين
على كل وش..
لـو تعرفــه
او حتى لو متعرفوش....
هتلاقى فيه
وشوش بتضحك
و وراها ماشية
وشوش بتبكى
ممكن تلاقى
وشوش تدارى
و جنب منها
وشوش بتحكى
و وشوش بترضى
و وشوش بتشكى
و وشوش تدور
بين ده و ده
و كلهم ماشيين كده
فى سكة واحدة
و فى النهاية
لابد تتلاقى الوشوش.....

انا المصرى

انا المصرى
انا المطحون
انا التعبان
انا اللى معدش ليا
على ارض بلدى مكان
انا الغلبان...

انا اللى راحت كرامتى
ولا عاد ليا سند
و صبحت غربتى
فى حضنك يا بلد
و الظلم حنا لى ضهرى
و الهم فيا اتولد
من يوم ما باعوا ارضى
و فيها الغريب اتوجد
انا المصرى...

انا اللى قالوا عنى
كريم العنصرين
و انى بنيت المجد
بين الاهرمين
ده المجد منى راح
سرقوه فى غمضة عين
و ما سابوا الا ذكرى..
الماضى و دمع حزين
انا المصرى اللى كنت
كريم العنصرين....

صراحة...

معرفش ليه دايما
اول ما عينى تشوفك
تلاقينى حاسس براحة...

و كمان كده دايما
اول ما بسمع صوتك
تلاقينى حاسس براحة...

و اول ما المح قصادى
ضـــى بسمتك
تلاقينى حاسس براحة...

معرفش ليه حتى
بحكى عليكى انا
بس اما بحكى عليكى
برضه تلاقينى
حاسس براحة...

ولا حتى عارف ليه
انا قلت كل ده
ممكن تقولى انها
كانت لحظة صراحة

محمد مسالم

يا تاريخ عروبتنا يا اسود
على حالنا اتفرج و اشهد
العربى بيقتل اخوه
و لقتل اخوه بيمجد

ده محمد ابن مسالم
ان كان مظلوم او ظالم
برضه هيفضل انسان
زيك زيه وكمان
لسانه بينطق عربى...

قتلوه و كأن ده فرض
ربطوه فى عمود النور
حطوه فى ميدان للعرض
حواليه الكل يدور
دمــه سايل ع الارض
و قلوبهم ارضها بور

و فى اى قانون او دين
القتل بيبقى شريعة ??
يتنفذ فى الميادين
و كأن الامر طبيعة
و الناس شايفيين...
ساكتين...
زى المتفرجين...
فى دنيا اتقلبت غابة
و وحوشها البنى ادميين