يمين

سألنى قبل كده
واحــد كــده
و قالى حضرتك
حزب ايه ؟؟
رديت و قلت له..
شــوف يا بيه
محسوبك حزب اليمين
باكل باليمين
و اشرب باليمين
و بطاقتى دايما معايا
شايلها فى جيبى اليمين
و الاقرار الضريبى
بكتبه باليمين..
و لما اشوف مظاهرة
دايما احود يمين
ده انا حتى اخر الليل
بنام على جنبى اليمين...

ميل عليا و عينه
بصت شمال و يمين
و قالى
م الاخر كده..
فى انتخابات الرئاسة
ناوى ترشح مين ؟؟

رديت عليه و قلت
هارشح اللى نازل
عشان الغلبانين
الشقيانين..
مش بتوع القروض
المتريشين..
هارشح اللى يبقى
ع البلد دى امين
اللى ما يخليهاش
لكلمة الغريب
ترضخ و تقول امين
و اللى يخلى ناسها
يناموا مرتاحين
مبسوطين..
مش يناموا و هما
من بكره مرعوبين
مكبوتين..
ناسيين حتى انهم
لسه بنى ادميين..

بصيت و قلت له
عرفت بقى يا سيدى
انا هارشح مين..
لقيته قايم وماشى
بقوله رايح فين
قالى هانفد بجلدى
و اقعد مع العاقلين..
و حلف لى 100 يمين
انى اكيد هربان
من مستشفى مجانين..

42

>>>> من وحى امتحان ال "operative" <<<<


على باب لجنة الامتحان
كل اللى ذاكرته طار
و الجو نار
قالولى درجة الحرارة
حوالى 42..

الامتحان بدأ..
الكل شاف الاسئلة
و جاله حالة ذهول
و الدنيا صبحت هادية
و معدش باقى غير
صوت تقليب الورق
و صوت واحد مراقب
غرقان عرق
سٍنه يجى كده
حوالى 42..

الوقت عدى
و معاه الامتحان..
و خرجت قرفان
زهقان...
حاسس دماغى مقفلة
و المشكلة..
انى كمان نسيت
كل الاسئلة
ماعدا سؤال كده
رقمه تقريبا كان
حوالى 42..

مبقتش عارف ليه
جابوا الامتحان
بالشكل ده ؟؟
و لا حتى عارف
ايه الهدف من كده
كل اللى عارفه
انى بقيت اتمنى
اجيب فى الامتحان
حوالى 42..

خالـــد

>>>> اهداء الى خالد محمد سعيد...شهيد الطوارئ <<<<


خالد مات
ياللى لابسين البدل
و حاطين البرفانات
ياللى عايشين جوه القصور
و مقفلين البوابات
خالد مات..
وقبل منه
مات فيكوا الضمير
و الانسانية..
من يو ما بعتونا
فى مجلسكوا الموقر
للعصبجية..
و قبضتوا التمن
فى الخفى..
و عميتوا عينكوا
عن اللى فات..
و رفعتوا ايدكوا بالموافقة
من سكات...
و مددتوا قانون الطوارئ....

خالد مات
و دمه غرق الشوارع
و الحارات
و انتوا قبضتوا التمن
و دمنا عندكوا
خلاص معدش فارق
مبروك عليكوا التمن
اللى اتدفع من دمنا
لاجل ما توافقوا
و تمددوا...

قانون الطوارئ...

حريـــة

>>>> رداً على اعتداء الكيان الصهيونى على قافلة الحرية <<<<


يا دولة الصهيونية
ياللى فى عرض البحر
غدرتى بالحرية
و قلتى دفاع عن امنك
و قلتى حرية...

فاكرة كمان
اما ضربتى الشيخ ياسين
القعيد...
بمروحية..
و قلتى دفاع عن امنك
و قلتى حرية...

و اما داست دباباتك
عل جسم طفل
فى ايده حجر
مش بندقية..
و قلتى دفاع عن امنك
و قلتى حرية...

و اما على غزة
كانت زى المطر..
قذايفك الفسفورية
و قلتى دفاع عن امنك
و قلتى حرية...

واما جيوشك
اتهجمت..
على ارض لبنان الفتية..
و قلتى دفاع عن امنك
و قلتى حرية...

اشمعنى دلوقتى
لما ايدنا اتمدت لغزة
بمساعدات..
وشوية ادوية و ميه
مبقتش دى حرية ؟؟

و اديتى امرك
لطياراتك..
و سفنك الحربية
لاجل ما تضربنا
فى عرض البحر
و قلتى حرية...

يا دولة الصهيونية
ياللى مسمية ارهابك
دفاع و حرية...
الكام كلمة دول
ليكى هدية....
من كل واحد عربى
على ارض عربية..
لا دباباتك
و لا طياراتك
ولا مدافعك
و لا رصاصك
ولا سفنك الحربية
هيخلونا نخاف
او نبيع القضية...