رباعيـات رمضـانية

-1-
هــل الـهـلال و الشـهـر دق الـبـاب
و انـت ذنـوبـك مـلـو بـحـر عُـبـاب
آن الاوان ترجع تـقصد وجه الكريم
ربـك حلـيـم يغـفـر لكل من لـه تـاب

-2-
انـسـى الهمـوم و افـتـح قـلـبك و زيـح
نَـفـسَك داويها بالصـوم و بالـتسابـيـح
ماتـخافش من جرحك لو مهما كان بيزيد
كـل الجروح بتطيـب ف ركعتين تراويح

-3-
يـا رب سـبـحـانـك..الـقـلـب قـالـهـا بـهـمـس
اصل الفروض خـمسين و برحمتك بقوا خمس
بـذنـوبـنا و عـيـوبـنا الـضـلـمة مَـلِـت الـكـون
و انـت رحـيـم بـيـنا...خـلـقـت نـور الـشـمـس

-4-
كـل النـفوس تايهة يا رب فى الملكوت
رافعة لـيك الايدين تـدعى بعلو الصوت
يـا رب يـا حَــنَّــان يا خـالـق الاكـوان
خلينا ليك اقـرب قـبـل و بـعـد الـمـوت

-5-
طَـبـع البـشر يـعـشقوا كل شئ ممنوع
نغـلط و تانى نـتـوب بعنـيـن ماليها دموع
خـافوا ف يوم ربكوا امـرُه عليكوا يكون
مـش كـل مرة اكيد هـتلاقوا وقـت رجوع

-6-
يـا ربـى قـرآنـك لـلـعـالـمـيـن ايـــة
ف القلب يتـقاد نور بكـلـمة من آيـة
قـدرنا يا اللـه و اجعـلنا بـيه عامـلين
ده رضـاك عليـنا هـو القصد و الغاية

-7-
يا رب ماتـسيبنيش وسـط الاغراب غريـب
قَوينى على نفسى و اجعلنى منك قريب
اغفـرلـى تـقصيرى و الـتوهـة ف الـدنـيا
و ارزقـنى بالجـنـة و اجمـعـنى ويا الحبيب

-8-
سجدوا الملايكة لادم و انت اللى مستكبر
النار تـسجد لطين !!؟ قـيـمـتك اكيد اكبر
القـيمة فى الطاعة..و انت عصيت الالـه
نـال الـملايكة رضـاه و انت اللى متحسر

-9-
يا رب عبدك ضعيف..تعبان من المشاوير
طـمعان فى حنيـتك و انت العـزيز القـدير
ادينى طرف الخـيـط..نَــوَر ضـلام قـلبـى
و لـسكـتـك خُـدنى و اجـعـلنى فـيها اسـير

-10-
متسلسلة الشياطين و الجنة بابها اتفتح
و الكـل مـتـلهـف..جـارى عـليها بفَـرح
يـا بخـت من نـالها و دخـلها مـتـطـمـن
مـن بيـن كـل العـباد هـو اكـيد من فَـلَـح

-11-
آمِـنا بيك و معـاك..لـكن بضهر الغـيب
ف السُنة و القرآن الحق كان ولا ريب
النـفس مُـشتاقـة..بالـلُـقية تـتـونـس
وياك يا سيدنا النبى يهجر قلوبنا الشيب

-12-
نَجـيـت يوسف صَغير لما رموه فى البير
و جـعـلـتـه لما كـبر من بعـد سجنه وزير
يـا رب سبـحـانـك قـادر عـلى كـل شـئ
مـهما يقـولوا مُـحال..تُـأمُـر..امـرك يصير

-13-
يـا رب قاصـديـنك...ثـبـتـنا ع الإيـمان
شيل من قلوبنا الشك..ريحنا م التوهان
الـدنـيـا غَرتـنا و القـلب مافـهـمـهـاش
دلـوقـتى لما فِـهـم..رٍجـع إلـيك نـدمـان

-14-
عـلـى ذكـر مَـلَـكـوتـك الـورد بـيـفَـتَـح
بحمدك انت الطير فوق فى السما يسَبَح
الكون يدور بنظام و يعبدك فى خشوع
و احنا البشر مازلنا عن سكـتك نِسرَح

-15-
من فـوق سـبـع سـماوات عـالم بأحوالـنا
نـغـلـط و لـمـا نــتوب تـغـفر و تـنسالـنا
نعصاك ولا بنخشى..تسترنا وسط الخلق
و إن مـهما قَـصَرنا..عُـمرك مـا تـهـمـلـنا

-16-
فى الضلمة يونس ناجاك من جوه بطن الحوت
اسـتـغـفرك فى دُعـاه و إيـمانه مِـلـو الصوت
يـا رب سـبـحـانـك..انـا كـنـت م الـظـالـمـين
عنى يا رب ارضى..و انا مش هاممنى الموت

-17-
يـا رب قـويـنـا و ارزقـنـا مـنك يـقـين
نـحسه بقـلوبـنا لو ماتـشوفوش العين
ترتاح بيه النفوس م التوهة و الحيرة
ننعم و نسعد بيه و ما يبقى بينا حزين

-18-
المـعـجـزة كـانـت لـنـبـيـنـا بـين الـحروف
الحـق فى الـقرآن و سكينة تـمحى الخوف
يـا مـعـشـر الـكـفـار ... هـاتـوا و لـو آيـة
مش انتوا قولتوا عليه شعر و كلام معروف

-19-
الارض و الـسمـوات و الشـمـس ويّـا الـقـمـر
بحر و جبال و غابات و الطير و غصن الشجر
و احـنا يـا رب عبـيدك...نـقـطـة فى مـلكوتـك
لانـت قـلوبـنا لـنورك..زى مـا لان لـه الحَـجَر

-20-
إفـتـح بـيـبان القـلب و ادعى بكل الامال
ارفـع ايـديـك لله ماتقولش ابـداً مُـحال
ربـك كـريم قـادر يـسـمـع لـمين يـدعـيه
و مـا بـين لحظة و تـانية يغـير الأحوال

-21-
فى المهد عيسى نطق و كلامه كان الحق
بعصايته موسى ضـرب البحر ليه اتشق
شـوف عظمة القهار..جنوده مـلو الكون
يُـنـصر بيـهم عبـيـده لما الامـور تضيَـق

-22-
صـابر على البلـوة راضـى يا رب بـقـضـاك
غيرك لمين اشكى ؟ ما عندى رب سواك
و انت عبـيدك كـتـير مـلو السـما و الارض
اقـبـلـنى يـا الله...مـش طـالـب إلا رضـاك

-23-
قَـدَرت مـصايرنـا و وراهـا كونَّـا اتوَجَـد
قاصدين وجهك يا رب مـنك بنطـلب مَـدَد
هَـوِن عليـنا الحيـاة و ألطف بنا فـيهـا
ده احنا بشر ياما و انت اللى واحد صَمَد

-24-
الـساعـة بـتـقـرب...و انـشـق لـيهـا الـقـمـر
و احـنـا مـسـيرنـا نـمـوت حـق عـلـينا و قـدر
حَـضَـرت إيـه ف دنـياك علـشان لُـقـا ربـك
ف الجنة راح تـنعم ؟ ولا هاتشقى ف سقر ؟

-25-
يـا رب سبـحـانـك خلـقـتـنا بإخـتـلاف
رزقـتـنا بالعـقـل و الحق كان متشاف
فـيـنا الـلى تـاه عـنك و غَـرتـه الدنـيا
و اللى لَمَس نورك و من عقابك خاف

-26-
يـا رب تجـعـلـنا بـيـمـيـنا نـلقى الكـتـاب
هون علينا الحر و الوقفة وقـت الحساب
ثـبـتـنـا بجـلالـك و احنا فـوق الصـراط
و اجمـعنا ف الجـنـة بنـبـيـنا و الاحـبـاب

-27-
بتـجمـعوا ف الـمـال و طـمـعكوا ماله حدود
فاكريـنها بـاقـيالكوا ؟؟ ف الجنة بس الخلود
هايفيد بإيـه الـمال...مالوش جيوب الكفن
ده الاصـل فـيـنـا طـيـن مـنـه و إلـيه نـعـود

-28-
الرحمة فـيك الطبع و الطبع فـيك غلاب
سـبـحانـه من طَبَعك اسمه عزيز وهاب
نَـزِل عـليـك الكـتاب كـامـل بلا نـقصـان
و الحـق فـيه بَـيّـن بـس لأولـى الالـباب

-29-
فـاتـح لـنا بابـك طـول الـنهار و الـلـيل
بتداوى ف جروحنا و بتـشفى كل عَـليل
يـا رب لـيك الحمـد و الشكر و العرفان
مهما بنـشكُر ليك برضه هايـبقى قَـليل

-30-
بـصـلـى و بـسـلـم...عـلـى خـيـر الانـــام
و بَـوَحَـد الـقـهـــار ... صـاحـى و لا بـيـنـام
اقـبـل يـا رب الصـوم و دعانا و الـتـسابـيـح
و الذكر ف التراويح و اعتـقـنا بـيه ف الختام

قـالولك فين !!؟

-1-

قـالولك فـيـن..يوَدى لـفـين ؟؟
قالولك ممكن..تروحله منين ؟؟
ما تجرب تمشى طوالى
و لف شمال
فى تانى يمين
هـتلقى انك فى غمضة عين
بقيت تايه و لو تسأل
يرد الناس :
قالولك فـيـن ؟؟

-2-

ما تيجى يا صاحبى نتجمع
و نتقابل على تمانية
خلاص ماتخافش ولا تقلق
هاكون فى ميعادى بالثانية
و ساعة تعدى و التانية
و لسه صاحبنا مش باين
و لميعاده ماهوش صاين
و يجى بعدها بساعتين
مسابقاه ضحكة عالخدين
و يتأسف 200 مرة
و يحلف ان دى المرة
اخر مرة...
و ابداً مش هاتتكرر
و بعد يومين و من تانى
ميعادنا يكون على تمانية
و ساعة تعدى و التانية
و برضه صاحبنا مش باين
و يجى برضه مـتأخر
و يحلف مش هاتتكرر
و مرة تعدى و التانية
و برضه صاحبنا يتأخر
ولا يجى على تمانية...

-3-

كل سنة و انت..طيب يا باشا
يا سكر مخَلَـط.. يا حتة بغاشة
فتح دماغك
و شخلل جيوبك
تمشى مصالحك
تدارى عيوبك
و ترتاح جنابك من خنقة طابور
لا وقفة ف زحمة ولا تستنى دور
ترَوَح ف ثانية معزز مكَرَم
و تـخْـلَص امورك بس انت تفهم
تفتح دماغك..تشخلل جيوبك
يا سكر مخلط يا حتة بغاشة
كل سنة وانت..دافعلى يا باشا

-4-

بيقولك عجلة الانتاج
ماهيش دايرة
بيقولك البلد دى خلاص
بقت بايرة
لا فى سياحة
ولا استثمار
و لا انتاج
و لا إعمار
و موت يا حمار
لحد ما يجى تانى عَمَار
ادى اللى جرالنا من يومها
ابو الثورة على الثوار

بيقولك فيه واحد مدسوس
بيقولك مسكوا تانى جاسوس
و ده هربان
و ده محبوس
و ده غلبان
ما عنده فلوس
و دول خونة و حرامية
و دول حبة بلطجية
و دول عملوا
و دول سووا
و دول عدلوا
و دول قلبوا

طب انت يا سيدى بعنيك شُـفـت ؟؟
او اتأكدت م اللى سـمعـت ؟؟
يرد يقول اكيد طبعا
كلامى ده حقيقة يا بـيـه
ما هو بيقولك ان فلان
شاف كل ده بعنيـه

..............

يا شعب اصيل و متأصل
بـغُـلـب و طيـبة متخَصَـل
مفيش زيك فى كل الكون
قصادك كل شئ بيهون
و من فَـكَـر يقف ضدك
ولا كان يوم و لا هايكون
لكن اه بس لو تـسـمع
و عن كام حاجة كده ترجع
تبطل تـنشر الاشاعات
و تقفل درج الإكراميات
و تُـضبُـط كل مواعيدك
و تعرف قيمة اللحظات
و تـنسى الفهلوة طَـبْـعك
و تـنسى كل من طَـبَـعَك
على هواه بطبع متفصل
و ادى كلامى اهه مفصل
يا شعب اصيل و متأصل