رد رسالة 2

>>>>>>من الجنيه للمواطن اللى بيتصعب عليه<<<<<<



زعلان عليا يا مواطن يا بسيط
و تقولى "عوموك..
غرقوك..بهدلوك"
شكللك كده واحد عبيط
ملكش غير فى الرغى..
و التنطيط
.......

اياك تكون فاكر

انى انتهيت
راحت عليا
او خلاص بقيت تاريخ
و اتنسيت.....
اهدى كده و بطل عويل
ده انا الجنيه الاصيل
انا العلامة
زى الهرم...زى النيل
شاهد على الزمن الجميل
واصل براسى للسحاب
و مش ذليل.....
و تقولى كنت زمان بكام دولار
و انى بقيت اجيب يادوب زرار
اما انت ياخى عليك هزار....
هى الحكاية دى بمزاجى
فكّر كده....
ايه اللى زود قيمة الدولار ؟؟
هتلاقى شعب شغال ليل نهار
ينحت فى صخر....
يـدوس فى نار.....
واخد جواه القرار
انه يعلى بعرقه قيمة الدولار.....
اما انتوا هنا خلاص ...مفيش ضمير
لا ليكوا شغلة ولا مشغلة
و الكل عايز مرتبه..يكون كبير
اهو كسلكوا ده بقى عيب خطير
هو اللى خلانى اسير.....
للدولار .... و الدينار
و غيرهم كتير

قصر الكلام
لو حد نفسه فى يوم يرجع زمان
يقوم يشمر.....
و يشتغل بضمير كمان
عشان يعلى قيمتى تانى
و معاها تعلى
قيمة الغلبان.....


الجنيه

رسالة 2

>>>>>من مواطن مصرى صعبان عليه الجنيه للجنيه<<<<<



عوموك يا جنيه عوموك
غرقوك.....
بهدلوك....
و لعملة معدن حولوك
هزأوك.....
وقالوا ايه بيطوروك
فاكر زمان...
ايام ما كانوا بيفكوك
بكام دولار..
دلوقتى اخرك تشترى
لقميص زرار..
او تشترى منديل ورق
يمسح عرق...اخر النهار
يادى العــــار

زعلان عليك انا يا جنيه
شوف عملوا فيك دلوقتى ايه
من بعد ما كنت زمان بتقلب
اى شحات لبيـــه
يلا...اقول ايه ولا ايه
بس ياريت لو تقولى
حضرتك ساكت ليه ؟؟
ملكش حس
و الكلام قافل عليه
هو انت مش حاسس بنفسك
ولا عاجبك الحال اللى انت فيه
يا جنـــــيه.......


اخوك المواطن

رد الرسالة

>>>>>يسلم الى أ.أ - الجيش المصرى بالكويت<<<<<


اخيرا افتكرت تبعتلى جواب
تسأل فيه عى الحال
و تطمن عليك الاحباب
مش مهم التأخير.. انا مش زعلانة
انا بجوابك ده طايرة و فرحانة
عارف اول ما شوفت الجواب
جريت و خطفته من تحت الباب
و رميت نفسى عالكرسى
و بلهفة بدأت اقرا
زى اللى يلاقى المََََيه وسط الصحرا

بعد ده كل بتسأل..حاسة بفرق؟
اما انت صحيح بايخ و معندك دم
ده انا فى غيابك ده كأنى شايلة الهم
الضحكة هجرانى..
و ايامى كلها بقت غم

و ده قبل ما يوصلنى جوابك
و معاه الفرح....
ده جوابك كان ليا
زى البلسم عالجرح.....

اول ما قريته حسيت روحى رجعت ليا
من بعد ما هجرتنى وقستها الدنيا عليا
و رجعلى النوم من بعد ماطالت لياليا...

عموما.....
مش عايزة اطول عليك فى الكلام
المهم ان انت بخير و الصحة تمام
و يا ريت متقطعش الجوابات
عن اهلك..
ولا عنى انا بالذات

و الكل هنا من قلبه
باعتلك ســــلامات


ب.ب

رسالة

>>>>>>رسالة من جندى مصرى يشارك فى حرب الخليج الى حبيبته<<<<<


انا هنا بكتبلك من على خط النار
بكتب وانا واقف وسط خراب و دمار
بكتب يا حبيبتى علشان احكى كل الاسرار
لكن الاول قوليلى, ايه الاخبار؟؟؟
عاملة اية من غيرى,
ياترى حاسة بفرق؟؟
ولا حياتك من غيرى مافيهاش فرق؟؟

انا بقى من غيرك حاسس انى ضعيف
مكسور و حزيـــــن
زى الشجرة فى وسط خريف

عارف ,
هاتقوليى انى معنديش قلب
هتقولى ازاى بكتب بمزاج وانا وسط الحرب
ازاى اسأل عالاخبار و اكتب عالحب
من غير كدب ,

حبك هو اللى مصبرنى عالايام ديه
م انتى عارفة
انا عمرى ما مسكت سلاح ولا بندقية
ولا عمرى لعبت حتى عسكر و حرامية

دلوقتى بقيت فى الجيش و فى ايدى سلاح
زرعونى فى حرب مش حربى
و عايزنى ارتاح....
ده انا لولا حبك جوايا
كان عقلى زمانه راح...

عموما..... فى الختام,
يا ريت توصلى منى السلام
للاهل و الاحباب
و الجيران و الصحاب
و ادعيلى ميطولش الغياب........

المخلص.....
أ.أ