خـطـوة

لسه خطـوة
لاجل بكره
لاجل ما تطرح نهار
لسه خطـوة
يا صبية
لاجل نبتدى المشوار

لسه الايادى قصيرة
لسه العيون متحيرة
لسالنا سور من بعده سور
لاجل نشوفك متحررة

لسه ف عروقى دم فاضل
لاجل ما افديكى بيه
لسه قلبى راح يناضل
ساكنك و انتى ساكنة فيه
لسه غـايـب طَـرح وردك
لسه فاسى ما شق ارضك
لاجل ما تطرح خَضَار
تطرح عَـمَـار
و تدور سواقيكى و تروى
ارض بــور
تطرح دهب و نار و نور
و اللى يـجور
على ارضنا..على حلمنا
نتزرعله ف حلقه مر
و لو علينا سنين تمر
ولا يوم هاننسى حقنا

لسه حاميكى مش حاميكى
لسه بايع مش شاريكى
لسه بيكتم الغُـنا
لسه بيهدم المُـنا
لكـنـنـا
و برغم تكتيف الايدين
و الغمامة ع العينين
حبك يا سمرة ف قلبنا
زى ديـن
لاجلك هانمشى ف دربنا
و نوَّفى ديـن
لاجلك هانبنى
لاجلك هانجنى
لاجلك هانبدأ الحكاية
ده انتى الهدف و كل غاية
بس فاضل ع البداية
لسه خطوة

صـوت الكـمان

صوت الكـمان
جو القلوب
فَـتَّـح بـيـبان
إحساس أمان
فرحة بتتسرسب برقة
من ورا ضهر الزمان

صوت الكـمان
جابلى معاه دوا للجراح
ضحكنى على كل اللى راح
ميل و قالى يا عبيط
ازاى بتنزل دمعتك
و ليه بتهجر ضحكتك
فـتح عينيك..شوف دنيتك
هتلاقى من حواليك براح

صوت الكـمان
كان الصديق
كان زى نجمة فى الطريق
على سرى كان المؤتمن
كان هو زادى فى الزمن
كان ضحكتى
كان فرحتى
كان إيد بتمسح دمعتى
و فى قلبى كان يخلق براح
لو يوم عليا الكون يضيق

صوت الكـمان
هَـز الزمن
صحى القلوب الميتة
من غير ما يطلب التمن
هو اللى قَـوِم فرحنا من مَـخـدَعُـه
هو اللى كان بيميل عليه و يـجَّـمَـعُه
و ان لاقى حزن بيقـلعه
مـع انى لما بسـمعه
كنت التقاه مليان شجن

سـاعات

سـاعات...
مع اننا مـا بـنلقى للـطريق اخِـر
مع اننا بنكون تايهين وعـ الاخِر
بنلاقى فرحتنا
و نلاقى طاقة نور
تملالنا سِـكِّـتنا
و ليه سْـكِـتنا !!؟؟
و نسينا ليه الحلم
و خوفنا سَـكِّـتنا

هى الحياة مشوار
من بعد ليلها نهار
و عشان تعدى بحورها
بـتعـاكس الـتـيار

و ان مرة موجها عِـلى
او ليها دمعك حِـلى
شمسك لازم هاتشرق
و الهم راح ينجِـلى

فاوعاك تيأس فى يوم
و اوعاك تبطل عوم
احلم دايما ببكره
بإيديك شُـق الغيوم

احلم و افرح و كون
و املك فـ لحظة الكون
و اياك تخاف..ده الجاى
هايعدى مهما يكون

و الصعب لازم يهون
بس انت جرب تكون
إنسان و م الاخِر
اول و مش اخِـر
و افتح فى مرة الأوكرة
و ازرع فى قلبك فكرة
ملفوفة فـ أمل بكره
و افرح و عـ الاخِر..
و اياك فى يوم تِخَلِى
لضِـحـكِـتك اخِـر

حـلمـت

حلمت ببيت فى عينى جميل
يـجَـمَّعـنا انا و انتى
و بنت جميلة بضفيرة
تشبِـهلك..تكون بنتى

حلمت براحة م التوهان
بدفا عيلة و دنيا امان
و شمس تضوى فى سمايا
و فرحة ماحسهاش إنسان

حلمتك و انتى ويايا
فى حزنى و فرحى و غنايا
بإيدك تمسحى دموعى
و تبقى المرسى لقلوعى
و انا اشيلك فى ننى العين
و ادارى عليكى بضلوعى

ولما اغلط تسامحينى
بنظرة عين و تحيينى
و لما الدنيا تجرحنى
برمش عينيكى تداوينى
تضمينى....
و من احزانى تاخدينى
و انسى المر فى عيونك
و عالدنيا تصالحينى

حلمت كتير و لما صحيت
على بابك انا دقـيت
و اشواقى مسابقانى
و صورتك مش مفارقانى
و قلبى يقول انا حَـبـيت

لكن ماعرفش ليه لما
قابلتك..الكلام ماتـقالش
و شفت عنيكى بتدارى
و بتخبى كلام ماتـقالش
و صبحت دنيتى حكاية
مَـنـهِية..بلا بـداية
و حزنى داريته فى قلبى
و اتارى القلب مابيحمَـلش
فمن تانى رجعت احلم
لَـقِـيت الحلم مابيكمَـلش