إثبـــات

غيرتك عليها
لما جت وقفت معاه
و اما شفت الضحكة طالة
من شفايفها الجُمال
لكن معاه..
و اما عينيك كانت عليها
و عيونها هى كانت معاه
ماكانتش غيرة...
غيرتك ساعتها
كانت شعور بالإنكسار
و ازاى يصير كل اللى صار
و ازاى مكانك فى الصور
ماعادش ليك
و ازاى عينيها اتبسمت
من غير عينيك
و اما تشوفك من بعيد
ازاى ما تـندهش عليك !!؟
و ازاى و ليه و مليون سؤال
من جوه عقلك احتلال
حالة جدال...
نسيت خلاص كل اللى فات !!؟
نسيت كلامنا بالعيون وسط السكات
نسيت لقانا و حلمنا
نسيت دموعنا و فرحنا
و لعبنا و جَدِنا
و كل يوم عدى بنا
نسيت خلاص كل الحاجات !!؟
لكن انت فاكر دى الحاجات
لساك فاكرها دى الحاجات
غيرتك ساعتها
ماكانتش غيرة...
او شعور بالافتقاد لدى الحاجات
غيرتك دليل اثبات
ان القليب اللى عشقته
عمره ما يوم فى القلب..مات
و ان اللى فات
بالرغم من كل الظروف
لساه ما فات

مـاتش اعتـزال

ضهره اتحنى
من شيله لهمومه التُـقال
المواصلات
الايجار
الدوا لاجل المدام
و الهدوم لاجل العيال
و مُرَتبه الكام جنيه
هايحل ايه ؟؟

.........

مدت ايديها
و البسمة مالية وشها
لمت مناديلها الورق
باست على ايد امها
و اتحركت

.........

جمع شتات فِكرُه
قَفِل دفاتره
و الشبابيك
و الادراج
حط الهموم و الكام جنيه
ف جيب جاكتته الشمال
و اتحرك

.........

الوقفة ف الزحمة
و الشمس مش راحمة
و مرارة الانتظار
ويا الضلوع لاحمة

يا دنيا طال الوقوف
و صاحبنا فيكى الخوف
امتى تسيبينا نشوف
الراحة لو ثانية

قطع الوقوف فجأة
صوت الكلاكس ايـاه
صوت القلوب حافظاه
علشان تملّى معاه
اتوبيس من الهيئة

ركبت كل البشر
ف لمحة من البصر
ضرب السواق كلاكسه
خاف الطريق يعاكسه
قَـلِب له نور و عاكسه
لان الطريق..فانتصر
و اتحرك

.........

" مناديل يا بيه
مناديل يا بيه "
ماشية تـنادى ف الزحام
بصت فى عين الكمسرى
اخدت تمام
"مناديل يا بيه
مناديل يا بيه "
بص ف عينيها الطيبين
شاف الشقى اد السنين
فنده عليها و قال..بكام ؟

مدت ايديها....اديته منديل ورق
مد الايدين...اداها كام جنيه ورق
اتبسمت
حبس الدموع جوه ف عينيه
" مناديل يا بيه
مناديل يا بيه "

.........

فجأة افتكر
هانزل هنا
نط م الباب اللى كان مفتوح قصاده
بدون حَذَر
من فرحته
اول ما لمس الارض...مـال
شبه اخـتلال
صوت الفرامل انطلق
فَـكَرُه بأم العيال
فَـكَرُه بهم العيال
فَـكَرُه بالكام جنيه
و المناديل الورق
فَـكَرُه بقلبه اللى ف عينيها اتسرق
فَـكَرُه بالابتسامة..المـعـجـزة
المـوجــزة
اللى خلت همه زال
و اللى كانت للحياة
ماتش اعتزال

الوش التانى

مانتاش ملاك
مانتاش رسول
مانتاش مُنَزَل م السما
معصوم ف قول
انت بشر
تغلط..تصيب
تكبر..تشيب
كله قدر
كاتبه عليك رب العباد
طب ليه مصمم ع العناد
و انك وحيد و انك فريد
و كلامك الصح الاكيد
و انك ملك ف الدنيا دى
و ان البشر دونك عبيد
فتح عينيك
شيل التعالى فى نظرتك
بين الجفون
مش كل كلمة ما تعجبكش
تقول جنون !!
هى الحياة ع الارض دى
مرهونة بيك !؟؟
حتى الرسول
و اسمه رسول
كان امره شورى
بينه و بين المؤمنين
اصل المشورة
توصية...
وصاها رب العالمين
و انت اللى شايف كلمتك
احسن كلام
بقى ده كلام ؟؟
مين ألَـهَـك !؟؟
و عن الغلط مين نَزَهك؟؟
يعنى اللى سَوَاك ف الحياة و بالعقل زانك
انـتزعه من كل البشر...خلاه عشانك ؟؟
يكفى عـناد
لو مهما كانت بذرتك
لازم هاتحتاج السماد
ناقش ف ده
و اقبل بده
و افتح بيبان عقلك لده
دى العملة لازم
يبقى ليها وش تانى
و عشان تشوفه
احياناً ممكن تعانى
لكن الـنهاية بـعد ده
هاتـنَوِلك كل المُراد
فبلاش عـناد