علشان صَغير

لساك صبى..صَغير..صَغير
قاعد بتلعب ع الحصير
و بتتشنكل فى خطوتك
تقع..فتعلى ضحكتك
و تقوم و تِـتـسَّـنِد على طرف السرير
علشان صَغير

لساك بتحلم بالمِـلَّبِس
و بتجرى على امك تساعدك
و انت بتلبس
و اما بييجوا يسألوك
و انت قاعد مع ابوك
تحلم بإيه اول ما تكبر ؟
دكتور اكيد...مرة ترد
و مرة تانية تقول..مهندس
مع ان حلمك فى الحقيقة
انك تطير
و سط السحاب بجناح كبير
بس لما بيسألوك
وانت قاعد مع ابوك
عمرك ما قلت..بحلم اطير
بتخاف من ضحكهم عليك
علشان صَغير

لساك بتلعب بالحصى
و بترمى فى الميه الحطب
لساك بضهر المعلقة
اسمك بتكتبه بالحروف
على ضهر كرسيك الخشب
لساك بتستنى المطر
و بتجرى ورا قوس القزح
فاكر فى اخره كوم دهب
و بتضحك على عم دهب
و تحب ميكى لما يقبض عالعصابة
و بطيابة...
تشجع الفار الضعيف
و تموت فى جلدك لما "توم" يقبض عليه
و تخاف عليه
يمكن لانه يشبهك
علشان صَغير

لسه الحاجات جوه ف عينيك
نفس الحاجات
لكن يا صاحبى للاسف
كل الحاجات اتغيرت
كل الحاجات اتبدلـت
و ف لحظة صبحت ذكريات
فنصيحة منى..
انسى اللى فات
و اكبر شوية
اعقل شوية
و العبها صح..خد و هات
اصل الحياة فى الدنيا دى
ماعادتش قعدة على الحصير
و لا عادش ينفع تانى فيها
انك تطير..
و تعيش صَغير...