جـــمــــال...

,,,,,فى الذكرى ال 40 لوفاة اشجع الرجال


اربعين سنة..
فاتوا علينا من بعدك
اربعين سنة..
عذاب و ذل من بعدك
اربعين سنة
عودونا فيهم
عالاهانة
و البطالة
و البهدلة
و المحسوبية
اربعين سنة....
و الظلم فاق كل الحدود
ياخدوا الغلابة يحبسوهم
و يسيبوا اللى يهرب بالقروض
و الغاز بقوا يصدروه لليهود
و خير ارضنا يروح لغيرنا
و احنا نصيبنا شوية وعود...
...اربعين سنة
و عَبّارات بالناس بتغرق كل يوم
و قمح فاسد يستوردوه
وقت اللزوم
و شباب خلاص
كرهوا بلدهم
و كل املهم
يهربوا منها
فى يوم
و مين نلوم
..ما كل ده بعدك
بقى ماركة مسجلة
يا جمــال...

مات جمال..
مات اللى كان
شايل هموم
زى الجبال
مات الزعيم
مات البطل
و وقف نبض العروبة
فى قلوب الرجال
...مات جمال
و عايزين النهارده
يجيبوا مكانه
جمال تانى
جمال تقليد
تايوانى...
عمره ما ينفع...
ما هو اصل مش كل
من ركب الحصان
يتقال عليه خَيـّـــال
ولا كل من اسمه جمال
ممكن فى يوم يبقى زيك
يا جمـــال...