قالوا فى الامثال
ان الزمن غدار..
كنت بقول ممكن
الا على اهل الدار
دلوقتى صدقتهم..
لما لقيت الدار
فوق راسنا صبحت هدد
و دار بينا الزمان
و لعبتى بينا يا بلد...
ايه اللى حصلك ؟؟
كنتى زمان كلك براح
كنت بحسك واسعة عليا
كنت بشوف فيك الامان
و احس فى ترابك بالحنان
دلوقت عايش فيكى وانا خايف
اصل خلاص.....
كل ما فيكى بقى زايف
حتى براحك..راح
وفى امرك انا حرت
هو انتى اللى كشيتى ؟؟
و لا انا اللى كبرت؟؟
و لا الزمان قساكى على ناسك
وفى اوضه رميتيهم
و قفلتى ترباسك
واديتى باقى البيت
للى مايستاهلوش
ادى شقانا و غلبنا
و تعبنا و سنينا
ضاعوا على فاشوش..
مالك كده ساكتة ؟؟
سايبة الايام تفوت
اتكلــــمى...
ما خلاص كفاية سكوت..
حلى ضفايرك
واصرخى بعلو الصوت
قولى انى حبيتك
مع ان حبك فى الزمن ده..
مـــــوت....
قولى انى لما نطقت
و قلتلك يا ام الضفاير
انى بحبك موت
و حلفت لاحميكى
بحياتى و سنينى
لحد ما ياخدنى الموت..
قالولى اخرس...
و حطوا فى ايدى حديد
و سجنونى..
بنوا زنزانتى جواكى
و فيها حبسونى
و ادوكى مفاتيحها
خلوكى سجنى..
خلوكى سجانى..
و آآآآآآآآآآآه يانى..
شكلى هقضى فى سجنك
الباقى فى زمانى
ما ازاى انا هاخرج ؟؟
ده انا تهمتى حبك,,,
و التهمة....
لابســانى....
ليست هناك تعليقات:
إرسال تعليق