بـدايــة

مين اللى قال الموت هو النهاية ؟
الموت..شراع
الموت حقيقة من بعد الخداع
الموت بداية تانية للحكاية

و بعدها..بيفترق الطريق
و يإما يبقى شطوط امان
او يبقى بحر و موج غريق
وكل سكة ليها م البشر..فريق

تكون فى ده
او حتى ده
انت اللى بايديك القرار
اصل الحياة زى اختبار
كافح و جاهد و اشتغل
كون فيها طاقة من الامل
و اياك تمل من العمل
و افتكر..فى كل لحظة
ان النتيجة بالاختيار

وان وقتك لما يجى
مش راح يفيد الاعتذار
جنة و نار
يا تروح هنا
يا تروح هنا
و مفيش إعادة للسنة

إعلانات مبوبة

-1-

للبيع...
قلب و معاه ابتسامة
و ذكريات..
و شوية حاجات
متزوقـين بالفرحة سـاعة
و معجونيـن بـالأه ساعات

قـلب لَـف و يـامـا شاف
و لا عمره يوم ف حياته خاف
لكن لما حَب مَرة
شاف حقيقة دنيا مُرة
علمتـه ازاى يخاف
و يخبى خوفه ف السكات
و يخبى اى فرحة عاشها
ف حكايات
و يعيش حياته كأنه مات
و عشان كده
قررت ابيعه من سكات
و الشارى هو اللى عليه التجديدات

-2-

للبيع...
فوراً و بدون تأخير
و بتـمن ماهوش كبير
كلمتين فى كام رسالة
بيوصفوا فى الحب حالة
فجأة اتـقـلبت محالة
و اللى كان فى يوم اكيد
تانى يوم بقى استحالة

و كام قصيدة فى الغَزَل
ينفـعوا يـبـقوا مَـثَـل
للى حب لكن ما قـالش
و اللى قال لكن ما طالش
و برغم ده شايف أمَـل
و إيه العمل !!؟
اصل الهوا
- هو الوحيد فى الدنيا دى -
اللى ملوش ابداً دوا

-3-

للبيع...
ورقة و قلم
و الف فكرة
و معاهم امبارح و بكره
و ضحكة شاردة
و شوية من حلم النهارده
و عمر راح و عمر جاى
و قلب خايف م اللى جاى
و عين و ضى..

و حاجات كتير متبعترة
متلونة و متغيرة
تاهت لكن قبل الاوان
مع انها كانت زمان
ملضومة جوه عُقد واحد
و الاسم كان..إنسان

C.V.

الإسم :

ابداً ما كان المشكلة
و لا سؤال م الاسئلة
من غيره , بـيـه
الدنيا ماشية
و انا زى حلقة ف سلسلة

السن :

العمر عايشه و السلام
افرح فى يوم
احزن فى يوم
و يعدى يوم من بعد يوم
و لا مرة اعِد فى الايام

العنوان :

بحلم القى ليا مكان
وف مرة يبقالى عنوان
نفسى فى ضِل
نفسى فى خِـل
نفسى فى يوم القى الامان
امانة لو حد التقاه
يبقى يقولى عالعنوان

المهارات :

بعرف اخبى الحزن فى كمى
اجدع من احسن ساحر
و ارسم ضحكة و امسح همى
و ف قلبى الدمعة بتعافر
و اعرف اكبر
و اعرف اصغر
و اعرف اطول
و اعرف ااقصر
و اعرف البس مليون وش
و اعرف اكدب و اعرف اغش
و اعرف اعمل مليون حاجة
و اقول فى الاخر..مـعـلش
و اقدر اكون عاقل جداً
و ف لحظة اقلب مجنون
ممكن اتشائم جداً
و اتفائل برضه بجنون
و اقدر الف ف ثانية الكون
و اتلون يجى بميت لون
و اقدر اكون...

تعرف حاجة..
انا م الاخر كده ولا حاجة
ولا بتجنن
و لا بتلون
و لا بعرف حتى البس وش
و لا اكدب ولا حتى اغش
تعرف حاجة..
انا فاشل اصلاً فى الكدب
حتى لو هاكدب على حالى
اصلاً لو فيه كنت انا شاطر
ولا كان عمره هايبقى ده حالى

صُـغَـيـر

لما اتدفا فى احضان امى
مهما كبرت بشوفنى صغير
و اما اعدى جنب ابويا
مهما طولت بشوفنى قصير
و اما اتصور وسط اصحابى
و اما اتجمـع ويّـا احبابى
و اما الدنيا تخبط بابى
بافتحلها من غير ما اتحير

و اجرى عليها بفرحة كأنى
عيل لسه صغير سنى
لكن فجأة فى وسط الفرحة
دايما تخلع عنها الطرحة
و ف لحظة و بدون تأخير
تسرق فرحى و تصبح جارحة
و تصحى الذكرى جوايا
و تفكرنى بألف حكاية
و اما ابص فى اى مراية
القى شكلى بقى متغير...

و ابدأ افكر فى النهايات
و فى اسئلة ملهاش اجابات
و اسرح جوه دولاب الماضى
و اسأل نفسى وانا متحير
هى المشكلة فى المرايات
ولا ف ماضى عدى وفات
ولا المـشكـلـة ويـَّا الدنـيا
انى كبرت..و قلبى صغير ؟؟

جَـرَّب

جَرَّب دَوَر فى رفوف قلبك
جَرَّب قَـلِـب فى البراويز
جَرَّب يوم تضحك من قلبك
و تعيشها من غير تبويز

جَرَّب مرة تعدى بحور
جَرَّب مرة تنط السور
اقفل مرة باب الدايرة
غمض عينك..و ابدأ دُوُر
و ما تـتـعـبـش

جَرَّب طير بجناح مفرود
اعلى و اعلى وانسى تعود
و اوعى تفكر ايه اللى جرالك
فكر بس انك موجود
و ما تـحـسـبـش

و انسى همومك
و انسى دموعك
و ازرع فرحة
جوه ضلوعك
و اما يقرب وقت رجوعك
اتشعلق فى نجوم السما
و ما تـفـلـتـش