ميرى..

اضرب يابو بيادة

اضرب و بزيادة
اسحل و عرى و دوس
ما القسوة فيك عادة
نـفذ اوامرهم
اهجم و حاميلهم
انسى اللى باقينلك
و اللى انت من بينهم
اضرب علينا النار
زيد فى القلوب النار
بينا و بين سيدك
اعراض و دم و تار
اضرب رصاصك حى
كل اللى ميت..حى
و ان مهما طال ليلك
النصرة نورها جاى
اضرب و على السور
خلى الرحايا تدور
و اوعاك فى يوم تـنسى
بعدى..عليك الدور
فاضرب يابو بيادة
انا لسه فيا الروح
اضرب و بزيادة
ريحة دمايا تفوح
اضرب يموت الشيخ
اضرب يموت مينا
برصاصك الميرى
ضربك...يـقوينا
و احنا هنا نوينا
نفتح و بإدينا
كل اللى مِتسَكَر
فاضرب و ما تفكر
اصرارنا راح يكبر
و برغم من ضربك
راح نِـسقط العسكر
راى نِـسقط العسكر
راح نِـسقط العسكر
-------------------------------------------------
يـسقـط يـسقـط حـكم الـعـسـكـر !!!

دوامـة...

طعم الحاجات اللى اختلف
بينبهك
و جراحك اللى تشبهك
بتشبهك
و تصادر الاحلام
دليل للاتهام
و توجهك
للتوهة جوه دوامة جدل
ازاى حصل ؟؟
و ليه حصل ؟؟
و الخط مال ولا اتعدل ؟؟

و الحزن ليه بيتقدر ؟
و ليه عالفرح مش باقدر
و ليه القلب كله جروح
محاوطانى و فين مابروح
دموع عينى ماتتقدر
يا ليل طولت ليه عَندى
و ليه يحلى ف عينيك عِندى
لو احكيـلك..بتتعذب
و ادارى عليك..تقوم تعتب
و تفرق دى - فى إيه - عن دى ؟

و تيجى تقول دواك تـنسى
طب انسى ازاى و انا لسه
برسم صورتها ليلاتى فى ضى القمر
و المح عيونها ف وسط اوراق الشجر
و ف بعادى و ف السفر
تطاردنى ف وشوش البشر
و ف العناوين و ف الاخبار
و ف كلامى و ف الاشعار
طب اقسى ازاى
او انساها
و انا قلبى ماهوش رسمة
على جذع شجرة..او حجر

ثم انى بعيش بذكراها
و تيجى تقولّى..إنساها !؟
ده حتى و لو..على القسى هاقـدر
و حتى و لو..ف نسيانها ما هاتحَسَّر
انا هارفض ...
و اقول لا
دى هى النبض و الدَقـة
و هى القسوة و الرقة
دى هى فى سنينى..
سنين ما عشتها
من وسط احلامى..
احلام ما شفتها
دى هى الروح...
ملازمانى..و لفين ما اروح
فـلو ذكراها راح توجع
و ف القلب تـسَّـكِن اه
انا راضى و هاتحمل
ماحلاه وجع..لو فيه الحياة

Snapshot - سناب شوت

قـالوا..."بتصرف" :

شمس...

الفرحة دايما..إبتسامة
و الدمع للأحزان..علامة
أما السهر فده إشتياق
و الحب عمره ما كان فراق
و إن كان على اللوم و العتاب
و التوهة من وسط الصحاب
برضه إشتياق...

نظر...

البسمة أحيانا غطا
فوق الآلام..
و الدمعة ساعة الفرح
أبلغ كلام..
أما السهر و الإشتياق
أكبر علامات الفراق
و إن كان على اللوم و العتاب
و التوهة من وسط الصحاب
فى القلب دول بيعششوا
و بيفتحوا للحزن باب..

حُـزن...

فيه الغيوم تتكاتر
ويّا الدموع إخوات
مطر العيون يجرح
نفس الصبى تجمح
لا بر للكئابة
ولا خيّال.... يكبح
مهما تطول مسافات

قمر...

و ليل حزنان
رافض غروب الشمس
رافض ملامها الهمس
للصبى الزعلان
يمكن
-و لو إنه ليل-
يمكن يابوى غيران

حب...

لسه الخَضَار عمران
بفرحة وردية
لسه لُـقـا الأحباب
ورا البيت القديم
ليه شوقة وديّة
لسه الشباب يتشاكس
على طلوع النخلة
وفى الآخر
ياخدوها نديّة
واللى يطول البلح
من حقه الهدية

فَـجْر...

جوه الحياة
الحب احيانا يكون
هو الحياة
و ساعات و من غير إختيار
الحب بيكون زى نار
تجرح و تكوى
و تزيدك آلام
تسرق ضى العيون
و معاه الإبتسام
و فى الختام
تزرع فى أخر الطريق
بذرة فراق..
الحب داء..
و مالوش دوا
اصلا عشان..هو الدوا

--------------------------

بقلم :

هبة طلعت
و
محمد كمال البارودى

عـــاد

ياللى انتوا لازقين عالكراسى
ياللى انتوا فاكرين انى ناسى
و انى خاضع
و انى طايع
و انى سايب حقى ضايع
انا جاى اهه..و بقولكوا
انا عكس كل دى الطبايع

و لا عمرى كنت مقطوع اللسان
و لا بدلدل ولا بطبل..ولا جبان
او العوبان
بمشى على الحبلين يومااتى
و بهلوان..

يا قوم عاد
فيكوا الفساد
غطى و زاد
يا قوم عاد
منكوا الفساد
غطى و زاد

طعمتم من خير البلاد
شربتم من خير البلاد
يا قوم عاد
ضاقت بكم نفس العباد

و ماهوش مزاد
قبل ما يبدأ
تفتحوا فى اظرفه
و تقسموه
سنة حياتكوا و عُرفُكوا
الواد يحل محل ابوه
و ان كان يتيم
يبقى اخوه
او ابن عمه
او ابن خالته
الالمعى..ملعون ابوه

و ابن الكبير
مولود كبير
زينة الشباب
ينفع معيد
ينفع عميد
و ده اى منصب
بيه يزيد
و مؤهلاته جلية للعيان
عالم جليل و من زمان
قيمة و سيمة و هيلامان
و اهه حتى واخد عالمكان

و انتوا تقولوا يجى ليه !!؟؟
اما انتوا نااااس
عايزين تساووا الراس براس
و نسيتوا مين فينا الاساس
اما انتوا نااااس !!

ياللى انتوا فاكرينها تكية
و بتسرقوا و بتنهبوا
و تقلبوا و تهلبوا
ويّا الحبايب و القرايب و الصحاب
ياللى انتوا فاكرينها لقية
بتبرطعوا و تجمعوا
وتقمعوا و تلمعوا
لاجل الحبايب و القرايب و الصحاب

اوعاكوا تفتكروا فى يوم
انى كمالة ماليش لزوم
او انى ناسى
و اوعاكوا تفتكروا فى يوم
اللزقة ليكوا راح تدوم
او راح تدوم ليكوا الكراسى

علشان صَغير

لساك صبى..صَغير..صَغير
قاعد بتلعب ع الحصير
و بتتشنكل فى خطوتك
تقع..فتعلى ضحكتك
و تقوم و تِـتـسَّـنِد على طرف السرير
علشان صَغير

لساك بتحلم بالمِـلَّبِس
و بتجرى على امك تساعدك
و انت بتلبس
و اما بييجوا يسألوك
و انت قاعد مع ابوك
تحلم بإيه اول ما تكبر ؟
دكتور اكيد...مرة ترد
و مرة تانية تقول..مهندس
مع ان حلمك فى الحقيقة
انك تطير
و سط السحاب بجناح كبير
بس لما بيسألوك
وانت قاعد مع ابوك
عمرك ما قلت..بحلم اطير
بتخاف من ضحكهم عليك
علشان صَغير

لساك بتلعب بالحصى
و بترمى فى الميه الحطب
لساك بضهر المعلقة
اسمك بتكتبه بالحروف
على ضهر كرسيك الخشب
لساك بتستنى المطر
و بتجرى ورا قوس القزح
فاكر فى اخره كوم دهب
و بتضحك على عم دهب
و تحب ميكى لما يقبض عالعصابة
و بطيابة...
تشجع الفار الضعيف
و تموت فى جلدك لما "توم" يقبض عليه
و تخاف عليه
يمكن لانه يشبهك
علشان صَغير

لسه الحاجات جوه ف عينيك
نفس الحاجات
لكن يا صاحبى للاسف
كل الحاجات اتغيرت
كل الحاجات اتبدلـت
و ف لحظة صبحت ذكريات
فنصيحة منى..
انسى اللى فات
و اكبر شوية
اعقل شوية
و العبها صح..خد و هات
اصل الحياة فى الدنيا دى
ماعادتش قعدة على الحصير
و لا عادش ينفع تانى فيها
انك تطير..
و تعيش صَغير...

يا وابور الساعة 12

يا وابور الساعة 12

يا مـقَـبِـل عالصعيد
هو انت عليا مقرب
و لا مسافر بعيد !؟؟

يا وابور الساعة 12
بلغ عنى برسالة
اكتبها بعرقى و دمى
عالجبهة فى القيالة
قول رجعت لينا الارض
و سترنا خلاص العرض
ده فداكى الموت كان فرض
و دى مش محتاجة قوالة

يا وابور الساعة 12
يا مـقَـبِـل عالصعيد
هو انت عليا مقرب
و لا مسافر بعيد !؟؟

يا وابور الساعة 12
يا محمل بالمراسيل
نسوك عنوان الفرحة
و بدمعك فاض النيل
امسح دمعك ده خلاص
علم الاعداء انداس
و قصاد ملايين الناس
راح يركع لينا ذليل

يا وابور الساعة 12
يا مـقَـبِـل عالصعيد
هو انت عليا مقرب
و لا مسافر بعيد !؟؟

يا وابور الساعة 12
يا اسمر كما لون الخلق
ازاى من بعد النَصرة
المُر يعود للحلق !؟؟
ازاى ارضى مش ارضى
و عدوى يعيش فيها مَرْضى
و انا منفى منها بعيد...
و ازاى غازى مش غازى
و منور بيت الغازى
و الضلمة فى بيتى تزيد..
و ازاى خيرى مش ليا
و ازاى بارت اراضيا
لو اصل المشكلة فيّا
افضحنى فى وسط الخلق

يا وابور الساعة 12
يا مـقَـبِـل عالصعيد
هو انت عليا مقرب
و لا مسافر بعيد !؟؟

يا وابور الساعة 12
الصبر اتعدى مداه
و ولادنا قالوها قوية
ما هنسجد غير لله
ياللى انتوا رفعتوا الروس
ف الماضى ليكوا دروس
دى الثورة كفاح ملموس
يناديكم..لبّوا نداه

يا وابور لساك بتـقَـبِـل
بتصفى عِدا و تغربِـل
و طريقك لسه مـكـمِـل
مفتوحة سماك لسماه

يا وابور الساعة 12
يا مـقَـبِـل عالصعيد
هو انت عليا مقرب
و لا مسافر بعيد !؟؟

إثبـــات

غيرتك عليها
لما جت وقفت معاه
و اما شفت الضحكة طالة
من شفايفها الجُمال
لكن معاه..
و اما عينيك كانت عليها
و عيونها هى كانت معاه
ماكانتش غيرة...
غيرتك ساعتها
كانت شعور بالإنكسار
و ازاى يصير كل اللى صار
و ازاى مكانك فى الصور
ماعادش ليك
و ازاى عينيها اتبسمت
من غير عينيك
و اما تشوفك من بعيد
ازاى ما تـندهش عليك !!؟
و ازاى و ليه و مليون سؤال
من جوه عقلك احتلال
حالة جدال...
نسيت خلاص كل اللى فات !!؟
نسيت كلامنا بالعيون وسط السكات
نسيت لقانا و حلمنا
نسيت دموعنا و فرحنا
و لعبنا و جَدِنا
و كل يوم عدى بنا
نسيت خلاص كل الحاجات !!؟
لكن انت فاكر دى الحاجات
لساك فاكرها دى الحاجات
غيرتك ساعتها
ماكانتش غيرة...
او شعور بالافتقاد لدى الحاجات
غيرتك دليل اثبات
ان القليب اللى عشقته
عمره ما يوم فى القلب..مات
و ان اللى فات
بالرغم من كل الظروف
لساه ما فات

مـاتش اعتـزال

ضهره اتحنى
من شيله لهمومه التُـقال
المواصلات
الايجار
الدوا لاجل المدام
و الهدوم لاجل العيال
و مُرَتبه الكام جنيه
هايحل ايه ؟؟

.........

مدت ايديها
و البسمة مالية وشها
لمت مناديلها الورق
باست على ايد امها
و اتحركت

.........

جمع شتات فِكرُه
قَفِل دفاتره
و الشبابيك
و الادراج
حط الهموم و الكام جنيه
ف جيب جاكتته الشمال
و اتحرك

.........

الوقفة ف الزحمة
و الشمس مش راحمة
و مرارة الانتظار
ويا الضلوع لاحمة

يا دنيا طال الوقوف
و صاحبنا فيكى الخوف
امتى تسيبينا نشوف
الراحة لو ثانية

قطع الوقوف فجأة
صوت الكلاكس ايـاه
صوت القلوب حافظاه
علشان تملّى معاه
اتوبيس من الهيئة

ركبت كل البشر
ف لمحة من البصر
ضرب السواق كلاكسه
خاف الطريق يعاكسه
قَـلِب له نور و عاكسه
لان الطريق..فانتصر
و اتحرك

.........

" مناديل يا بيه
مناديل يا بيه "
ماشية تـنادى ف الزحام
بصت فى عين الكمسرى
اخدت تمام
"مناديل يا بيه
مناديل يا بيه "
بص ف عينيها الطيبين
شاف الشقى اد السنين
فنده عليها و قال..بكام ؟

مدت ايديها....اديته منديل ورق
مد الايدين...اداها كام جنيه ورق
اتبسمت
حبس الدموع جوه ف عينيه
" مناديل يا بيه
مناديل يا بيه "

.........

فجأة افتكر
هانزل هنا
نط م الباب اللى كان مفتوح قصاده
بدون حَذَر
من فرحته
اول ما لمس الارض...مـال
شبه اخـتلال
صوت الفرامل انطلق
فَـكَرُه بأم العيال
فَـكَرُه بهم العيال
فَـكَرُه بالكام جنيه
و المناديل الورق
فَـكَرُه بقلبه اللى ف عينيها اتسرق
فَـكَرُه بالابتسامة..المـعـجـزة
المـوجــزة
اللى خلت همه زال
و اللى كانت للحياة
ماتش اعتزال

الوش التانى

مانتاش ملاك
مانتاش رسول
مانتاش مُنَزَل م السما
معصوم ف قول
انت بشر
تغلط..تصيب
تكبر..تشيب
كله قدر
كاتبه عليك رب العباد
طب ليه مصمم ع العناد
و انك وحيد و انك فريد
و كلامك الصح الاكيد
و انك ملك ف الدنيا دى
و ان البشر دونك عبيد
فتح عينيك
شيل التعالى فى نظرتك
بين الجفون
مش كل كلمة ما تعجبكش
تقول جنون !!
هى الحياة ع الارض دى
مرهونة بيك !؟؟
حتى الرسول
و اسمه رسول
كان امره شورى
بينه و بين المؤمنين
اصل المشورة
توصية...
وصاها رب العالمين
و انت اللى شايف كلمتك
احسن كلام
بقى ده كلام ؟؟
مين ألَـهَـك !؟؟
و عن الغلط مين نَزَهك؟؟
يعنى اللى سَوَاك ف الحياة و بالعقل زانك
انـتزعه من كل البشر...خلاه عشانك ؟؟
يكفى عـناد
لو مهما كانت بذرتك
لازم هاتحتاج السماد
ناقش ف ده
و اقبل بده
و افتح بيبان عقلك لده
دى العملة لازم
يبقى ليها وش تانى
و عشان تشوفه
احياناً ممكن تعانى
لكن الـنهاية بـعد ده
هاتـنَوِلك كل المُراد
فبلاش عـناد

رباعيـات رمضـانية

-1-
هــل الـهـلال و الشـهـر دق الـبـاب
و انـت ذنـوبـك مـلـو بـحـر عُـبـاب
آن الاوان ترجع تـقصد وجه الكريم
ربـك حلـيـم يغـفـر لكل من لـه تـاب

-2-
انـسـى الهمـوم و افـتـح قـلـبك و زيـح
نَـفـسَك داويها بالصـوم و بالـتسابـيـح
ماتـخافش من جرحك لو مهما كان بيزيد
كـل الجروح بتطيـب ف ركعتين تراويح

-3-
يـا رب سـبـحـانـك..الـقـلـب قـالـهـا بـهـمـس
اصل الفروض خـمسين و برحمتك بقوا خمس
بـذنـوبـنا و عـيـوبـنا الـضـلـمة مَـلِـت الـكـون
و انـت رحـيـم بـيـنا...خـلـقـت نـور الـشـمـس

-4-
كـل النـفوس تايهة يا رب فى الملكوت
رافعة لـيك الايدين تـدعى بعلو الصوت
يـا رب يـا حَــنَّــان يا خـالـق الاكـوان
خلينا ليك اقـرب قـبـل و بـعـد الـمـوت

-5-
طَـبـع البـشر يـعـشقوا كل شئ ممنوع
نغـلط و تانى نـتـوب بعنـيـن ماليها دموع
خـافوا ف يوم ربكوا امـرُه عليكوا يكون
مـش كـل مرة اكيد هـتلاقوا وقـت رجوع

-6-
يـا ربـى قـرآنـك لـلـعـالـمـيـن ايـــة
ف القلب يتـقاد نور بكـلـمة من آيـة
قـدرنا يا اللـه و اجعـلنا بـيه عامـلين
ده رضـاك عليـنا هـو القصد و الغاية

-7-
يا رب ماتـسيبنيش وسـط الاغراب غريـب
قَوينى على نفسى و اجعلنى منك قريب
اغفـرلـى تـقصيرى و الـتوهـة ف الـدنـيا
و ارزقـنى بالجـنـة و اجمـعـنى ويا الحبيب

-8-
سجدوا الملايكة لادم و انت اللى مستكبر
النار تـسجد لطين !!؟ قـيـمـتك اكيد اكبر
القـيمة فى الطاعة..و انت عصيت الالـه
نـال الـملايكة رضـاه و انت اللى متحسر

-9-
يا رب عبدك ضعيف..تعبان من المشاوير
طـمعان فى حنيـتك و انت العـزيز القـدير
ادينى طرف الخـيـط..نَــوَر ضـلام قـلبـى
و لـسكـتـك خُـدنى و اجـعـلنى فـيها اسـير

-10-
متسلسلة الشياطين و الجنة بابها اتفتح
و الكـل مـتـلهـف..جـارى عـليها بفَـرح
يـا بخـت من نـالها و دخـلها مـتـطـمـن
مـن بيـن كـل العـباد هـو اكـيد من فَـلَـح

-11-
آمِـنا بيك و معـاك..لـكن بضهر الغـيب
ف السُنة و القرآن الحق كان ولا ريب
النـفس مُـشتاقـة..بالـلُـقية تـتـونـس
وياك يا سيدنا النبى يهجر قلوبنا الشيب

-12-
نَجـيـت يوسف صَغير لما رموه فى البير
و جـعـلـتـه لما كـبر من بعـد سجنه وزير
يـا رب سبـحـانـك قـادر عـلى كـل شـئ
مـهما يقـولوا مُـحال..تُـأمُـر..امـرك يصير

-13-
يـا رب قاصـديـنك...ثـبـتـنا ع الإيـمان
شيل من قلوبنا الشك..ريحنا م التوهان
الـدنـيـا غَرتـنا و القـلب مافـهـمـهـاش
دلـوقـتى لما فِـهـم..رٍجـع إلـيك نـدمـان

-14-
عـلـى ذكـر مَـلَـكـوتـك الـورد بـيـفَـتَـح
بحمدك انت الطير فوق فى السما يسَبَح
الكون يدور بنظام و يعبدك فى خشوع
و احنا البشر مازلنا عن سكـتك نِسرَح

-15-
من فـوق سـبـع سـماوات عـالم بأحوالـنا
نـغـلـط و لـمـا نــتوب تـغـفر و تـنسالـنا
نعصاك ولا بنخشى..تسترنا وسط الخلق
و إن مـهما قَـصَرنا..عُـمرك مـا تـهـمـلـنا

-16-
فى الضلمة يونس ناجاك من جوه بطن الحوت
اسـتـغـفرك فى دُعـاه و إيـمانه مِـلـو الصوت
يـا رب سـبـحـانـك..انـا كـنـت م الـظـالـمـين
عنى يا رب ارضى..و انا مش هاممنى الموت

-17-
يـا رب قـويـنـا و ارزقـنـا مـنك يـقـين
نـحسه بقـلوبـنا لو ماتـشوفوش العين
ترتاح بيه النفوس م التوهة و الحيرة
ننعم و نسعد بيه و ما يبقى بينا حزين

-18-
المـعـجـزة كـانـت لـنـبـيـنـا بـين الـحروف
الحـق فى الـقرآن و سكينة تـمحى الخوف
يـا مـعـشـر الـكـفـار ... هـاتـوا و لـو آيـة
مش انتوا قولتوا عليه شعر و كلام معروف

-19-
الارض و الـسمـوات و الشـمـس ويّـا الـقـمـر
بحر و جبال و غابات و الطير و غصن الشجر
و احـنا يـا رب عبـيدك...نـقـطـة فى مـلكوتـك
لانـت قـلوبـنا لـنورك..زى مـا لان لـه الحَـجَر

-20-
إفـتـح بـيـبان القـلب و ادعى بكل الامال
ارفـع ايـديـك لله ماتقولش ابـداً مُـحال
ربـك كـريم قـادر يـسـمـع لـمين يـدعـيه
و مـا بـين لحظة و تـانية يغـير الأحوال

-21-
فى المهد عيسى نطق و كلامه كان الحق
بعصايته موسى ضـرب البحر ليه اتشق
شـوف عظمة القهار..جنوده مـلو الكون
يُـنـصر بيـهم عبـيـده لما الامـور تضيَـق

-22-
صـابر على البلـوة راضـى يا رب بـقـضـاك
غيرك لمين اشكى ؟ ما عندى رب سواك
و انت عبـيدك كـتـير مـلو السـما و الارض
اقـبـلـنى يـا الله...مـش طـالـب إلا رضـاك

-23-
قَـدَرت مـصايرنـا و وراهـا كونَّـا اتوَجَـد
قاصدين وجهك يا رب مـنك بنطـلب مَـدَد
هَـوِن عليـنا الحيـاة و ألطف بنا فـيهـا
ده احنا بشر ياما و انت اللى واحد صَمَد

-24-
الـساعـة بـتـقـرب...و انـشـق لـيهـا الـقـمـر
و احـنـا مـسـيرنـا نـمـوت حـق عـلـينا و قـدر
حَـضَـرت إيـه ف دنـياك علـشان لُـقـا ربـك
ف الجنة راح تـنعم ؟ ولا هاتشقى ف سقر ؟

-25-
يـا رب سبـحـانـك خلـقـتـنا بإخـتـلاف
رزقـتـنا بالعـقـل و الحق كان متشاف
فـيـنا الـلى تـاه عـنك و غَـرتـه الدنـيا
و اللى لَمَس نورك و من عقابك خاف

-26-
يـا رب تجـعـلـنا بـيـمـيـنا نـلقى الكـتـاب
هون علينا الحر و الوقفة وقـت الحساب
ثـبـتـنـا بجـلالـك و احنا فـوق الصـراط
و اجمـعنا ف الجـنـة بنـبـيـنا و الاحـبـاب

-27-
بتـجمـعوا ف الـمـال و طـمـعكوا ماله حدود
فاكريـنها بـاقـيالكوا ؟؟ ف الجنة بس الخلود
هايفيد بإيـه الـمال...مالوش جيوب الكفن
ده الاصـل فـيـنـا طـيـن مـنـه و إلـيه نـعـود

-28-
الرحمة فـيك الطبع و الطبع فـيك غلاب
سـبـحانـه من طَبَعك اسمه عزيز وهاب
نَـزِل عـليـك الكـتاب كـامـل بلا نـقصـان
و الحـق فـيه بَـيّـن بـس لأولـى الالـباب

-29-
فـاتـح لـنا بابـك طـول الـنهار و الـلـيل
بتداوى ف جروحنا و بتـشفى كل عَـليل
يـا رب لـيك الحمـد و الشكر و العرفان
مهما بنـشكُر ليك برضه هايـبقى قَـليل

-30-
بـصـلـى و بـسـلـم...عـلـى خـيـر الانـــام
و بَـوَحَـد الـقـهـــار ... صـاحـى و لا بـيـنـام
اقـبـل يـا رب الصـوم و دعانا و الـتـسابـيـح
و الذكر ف التراويح و اعتـقـنا بـيه ف الختام

قـالولك فين !!؟

-1-

قـالولك فـيـن..يوَدى لـفـين ؟؟
قالولك ممكن..تروحله منين ؟؟
ما تجرب تمشى طوالى
و لف شمال
فى تانى يمين
هـتلقى انك فى غمضة عين
بقيت تايه و لو تسأل
يرد الناس :
قالولك فـيـن ؟؟

-2-

ما تيجى يا صاحبى نتجمع
و نتقابل على تمانية
خلاص ماتخافش ولا تقلق
هاكون فى ميعادى بالثانية
و ساعة تعدى و التانية
و لسه صاحبنا مش باين
و لميعاده ماهوش صاين
و يجى بعدها بساعتين
مسابقاه ضحكة عالخدين
و يتأسف 200 مرة
و يحلف ان دى المرة
اخر مرة...
و ابداً مش هاتتكرر
و بعد يومين و من تانى
ميعادنا يكون على تمانية
و ساعة تعدى و التانية
و برضه صاحبنا مش باين
و يجى برضه مـتأخر
و يحلف مش هاتتكرر
و مرة تعدى و التانية
و برضه صاحبنا يتأخر
ولا يجى على تمانية...

-3-

كل سنة و انت..طيب يا باشا
يا سكر مخَلَـط.. يا حتة بغاشة
فتح دماغك
و شخلل جيوبك
تمشى مصالحك
تدارى عيوبك
و ترتاح جنابك من خنقة طابور
لا وقفة ف زحمة ولا تستنى دور
ترَوَح ف ثانية معزز مكَرَم
و تـخْـلَص امورك بس انت تفهم
تفتح دماغك..تشخلل جيوبك
يا سكر مخلط يا حتة بغاشة
كل سنة وانت..دافعلى يا باشا

-4-

بيقولك عجلة الانتاج
ماهيش دايرة
بيقولك البلد دى خلاص
بقت بايرة
لا فى سياحة
ولا استثمار
و لا انتاج
و لا إعمار
و موت يا حمار
لحد ما يجى تانى عَمَار
ادى اللى جرالنا من يومها
ابو الثورة على الثوار

بيقولك فيه واحد مدسوس
بيقولك مسكوا تانى جاسوس
و ده هربان
و ده محبوس
و ده غلبان
ما عنده فلوس
و دول خونة و حرامية
و دول حبة بلطجية
و دول عملوا
و دول سووا
و دول عدلوا
و دول قلبوا

طب انت يا سيدى بعنيك شُـفـت ؟؟
او اتأكدت م اللى سـمعـت ؟؟
يرد يقول اكيد طبعا
كلامى ده حقيقة يا بـيـه
ما هو بيقولك ان فلان
شاف كل ده بعنيـه

..............

يا شعب اصيل و متأصل
بـغُـلـب و طيـبة متخَصَـل
مفيش زيك فى كل الكون
قصادك كل شئ بيهون
و من فَـكَـر يقف ضدك
ولا كان يوم و لا هايكون
لكن اه بس لو تـسـمع
و عن كام حاجة كده ترجع
تبطل تـنشر الاشاعات
و تقفل درج الإكراميات
و تُـضبُـط كل مواعيدك
و تعرف قيمة اللحظات
و تـنسى الفهلوة طَـبْـعك
و تـنسى كل من طَـبَـعَك
على هواه بطبع متفصل
و ادى كلامى اهه مفصل
يا شعب اصيل و متأصل

خـطـوة

لسه خطـوة
لاجل بكره
لاجل ما تطرح نهار
لسه خطـوة
يا صبية
لاجل نبتدى المشوار

لسه الايادى قصيرة
لسه العيون متحيرة
لسالنا سور من بعده سور
لاجل نشوفك متحررة

لسه ف عروقى دم فاضل
لاجل ما افديكى بيه
لسه قلبى راح يناضل
ساكنك و انتى ساكنة فيه
لسه غـايـب طَـرح وردك
لسه فاسى ما شق ارضك
لاجل ما تطرح خَضَار
تطرح عَـمَـار
و تدور سواقيكى و تروى
ارض بــور
تطرح دهب و نار و نور
و اللى يـجور
على ارضنا..على حلمنا
نتزرعله ف حلقه مر
و لو علينا سنين تمر
ولا يوم هاننسى حقنا

لسه حاميكى مش حاميكى
لسه بايع مش شاريكى
لسه بيكتم الغُـنا
لسه بيهدم المُـنا
لكـنـنـا
و برغم تكتيف الايدين
و الغمامة ع العينين
حبك يا سمرة ف قلبنا
زى ديـن
لاجلك هانمشى ف دربنا
و نوَّفى ديـن
لاجلك هانبنى
لاجلك هانجنى
لاجلك هانبدأ الحكاية
ده انتى الهدف و كل غاية
بس فاضل ع البداية
لسه خطوة

صـوت الكـمان

صوت الكـمان
جو القلوب
فَـتَّـح بـيـبان
إحساس أمان
فرحة بتتسرسب برقة
من ورا ضهر الزمان

صوت الكـمان
جابلى معاه دوا للجراح
ضحكنى على كل اللى راح
ميل و قالى يا عبيط
ازاى بتنزل دمعتك
و ليه بتهجر ضحكتك
فـتح عينيك..شوف دنيتك
هتلاقى من حواليك براح

صوت الكـمان
كان الصديق
كان زى نجمة فى الطريق
على سرى كان المؤتمن
كان هو زادى فى الزمن
كان ضحكتى
كان فرحتى
كان إيد بتمسح دمعتى
و فى قلبى كان يخلق براح
لو يوم عليا الكون يضيق

صوت الكـمان
هَـز الزمن
صحى القلوب الميتة
من غير ما يطلب التمن
هو اللى قَـوِم فرحنا من مَـخـدَعُـه
هو اللى كان بيميل عليه و يـجَّـمَـعُه
و ان لاقى حزن بيقـلعه
مـع انى لما بسـمعه
كنت التقاه مليان شجن

سـاعات

سـاعات...
مع اننا مـا بـنلقى للـطريق اخِـر
مع اننا بنكون تايهين وعـ الاخِر
بنلاقى فرحتنا
و نلاقى طاقة نور
تملالنا سِـكِّـتنا
و ليه سْـكِـتنا !!؟؟
و نسينا ليه الحلم
و خوفنا سَـكِّـتنا

هى الحياة مشوار
من بعد ليلها نهار
و عشان تعدى بحورها
بـتعـاكس الـتـيار

و ان مرة موجها عِـلى
او ليها دمعك حِـلى
شمسك لازم هاتشرق
و الهم راح ينجِـلى

فاوعاك تيأس فى يوم
و اوعاك تبطل عوم
احلم دايما ببكره
بإيديك شُـق الغيوم

احلم و افرح و كون
و املك فـ لحظة الكون
و اياك تخاف..ده الجاى
هايعدى مهما يكون

و الصعب لازم يهون
بس انت جرب تكون
إنسان و م الاخِر
اول و مش اخِـر
و افتح فى مرة الأوكرة
و ازرع فى قلبك فكرة
ملفوفة فـ أمل بكره
و افرح و عـ الاخِر..
و اياك فى يوم تِخَلِى
لضِـحـكِـتك اخِـر

حـلمـت

حلمت ببيت فى عينى جميل
يـجَـمَّعـنا انا و انتى
و بنت جميلة بضفيرة
تشبِـهلك..تكون بنتى

حلمت براحة م التوهان
بدفا عيلة و دنيا امان
و شمس تضوى فى سمايا
و فرحة ماحسهاش إنسان

حلمتك و انتى ويايا
فى حزنى و فرحى و غنايا
بإيدك تمسحى دموعى
و تبقى المرسى لقلوعى
و انا اشيلك فى ننى العين
و ادارى عليكى بضلوعى

ولما اغلط تسامحينى
بنظرة عين و تحيينى
و لما الدنيا تجرحنى
برمش عينيكى تداوينى
تضمينى....
و من احزانى تاخدينى
و انسى المر فى عيونك
و عالدنيا تصالحينى

حلمت كتير و لما صحيت
على بابك انا دقـيت
و اشواقى مسابقانى
و صورتك مش مفارقانى
و قلبى يقول انا حَـبـيت

لكن ماعرفش ليه لما
قابلتك..الكلام ماتـقالش
و شفت عنيكى بتدارى
و بتخبى كلام ماتـقالش
و صبحت دنيتى حكاية
مَـنـهِية..بلا بـداية
و حزنى داريته فى قلبى
و اتارى القلب مابيحمَـلش
فمن تانى رجعت احلم
لَـقِـيت الحلم مابيكمَـلش

بـدايــة

مين اللى قال الموت هو النهاية ؟
الموت..شراع
الموت حقيقة من بعد الخداع
الموت بداية تانية للحكاية

و بعدها..بيفترق الطريق
و يإما يبقى شطوط امان
او يبقى بحر و موج غريق
وكل سكة ليها م البشر..فريق

تكون فى ده
او حتى ده
انت اللى بايديك القرار
اصل الحياة زى اختبار
كافح و جاهد و اشتغل
كون فيها طاقة من الامل
و اياك تمل من العمل
و افتكر..فى كل لحظة
ان النتيجة بالاختيار

وان وقتك لما يجى
مش راح يفيد الاعتذار
جنة و نار
يا تروح هنا
يا تروح هنا
و مفيش إعادة للسنة

إعلانات مبوبة

-1-

للبيع...
قلب و معاه ابتسامة
و ذكريات..
و شوية حاجات
متزوقـين بالفرحة سـاعة
و معجونيـن بـالأه ساعات

قـلب لَـف و يـامـا شاف
و لا عمره يوم ف حياته خاف
لكن لما حَب مَرة
شاف حقيقة دنيا مُرة
علمتـه ازاى يخاف
و يخبى خوفه ف السكات
و يخبى اى فرحة عاشها
ف حكايات
و يعيش حياته كأنه مات
و عشان كده
قررت ابيعه من سكات
و الشارى هو اللى عليه التجديدات

-2-

للبيع...
فوراً و بدون تأخير
و بتـمن ماهوش كبير
كلمتين فى كام رسالة
بيوصفوا فى الحب حالة
فجأة اتـقـلبت محالة
و اللى كان فى يوم اكيد
تانى يوم بقى استحالة

و كام قصيدة فى الغَزَل
ينفـعوا يـبـقوا مَـثَـل
للى حب لكن ما قـالش
و اللى قال لكن ما طالش
و برغم ده شايف أمَـل
و إيه العمل !!؟
اصل الهوا
- هو الوحيد فى الدنيا دى -
اللى ملوش ابداً دوا

-3-

للبيع...
ورقة و قلم
و الف فكرة
و معاهم امبارح و بكره
و ضحكة شاردة
و شوية من حلم النهارده
و عمر راح و عمر جاى
و قلب خايف م اللى جاى
و عين و ضى..

و حاجات كتير متبعترة
متلونة و متغيرة
تاهت لكن قبل الاوان
مع انها كانت زمان
ملضومة جوه عُقد واحد
و الاسم كان..إنسان

C.V.

الإسم :

ابداً ما كان المشكلة
و لا سؤال م الاسئلة
من غيره , بـيـه
الدنيا ماشية
و انا زى حلقة ف سلسلة

السن :

العمر عايشه و السلام
افرح فى يوم
احزن فى يوم
و يعدى يوم من بعد يوم
و لا مرة اعِد فى الايام

العنوان :

بحلم القى ليا مكان
وف مرة يبقالى عنوان
نفسى فى ضِل
نفسى فى خِـل
نفسى فى يوم القى الامان
امانة لو حد التقاه
يبقى يقولى عالعنوان

المهارات :

بعرف اخبى الحزن فى كمى
اجدع من احسن ساحر
و ارسم ضحكة و امسح همى
و ف قلبى الدمعة بتعافر
و اعرف اكبر
و اعرف اصغر
و اعرف اطول
و اعرف ااقصر
و اعرف البس مليون وش
و اعرف اكدب و اعرف اغش
و اعرف اعمل مليون حاجة
و اقول فى الاخر..مـعـلش
و اقدر اكون عاقل جداً
و ف لحظة اقلب مجنون
ممكن اتشائم جداً
و اتفائل برضه بجنون
و اقدر الف ف ثانية الكون
و اتلون يجى بميت لون
و اقدر اكون...

تعرف حاجة..
انا م الاخر كده ولا حاجة
ولا بتجنن
و لا بتلون
و لا بعرف حتى البس وش
و لا اكدب ولا حتى اغش
تعرف حاجة..
انا فاشل اصلاً فى الكدب
حتى لو هاكدب على حالى
اصلاً لو فيه كنت انا شاطر
ولا كان عمره هايبقى ده حالى

صُـغَـيـر

لما اتدفا فى احضان امى
مهما كبرت بشوفنى صغير
و اما اعدى جنب ابويا
مهما طولت بشوفنى قصير
و اما اتصور وسط اصحابى
و اما اتجمـع ويّـا احبابى
و اما الدنيا تخبط بابى
بافتحلها من غير ما اتحير

و اجرى عليها بفرحة كأنى
عيل لسه صغير سنى
لكن فجأة فى وسط الفرحة
دايما تخلع عنها الطرحة
و ف لحظة و بدون تأخير
تسرق فرحى و تصبح جارحة
و تصحى الذكرى جوايا
و تفكرنى بألف حكاية
و اما ابص فى اى مراية
القى شكلى بقى متغير...

و ابدأ افكر فى النهايات
و فى اسئلة ملهاش اجابات
و اسرح جوه دولاب الماضى
و اسأل نفسى وانا متحير
هى المشكلة فى المرايات
ولا ف ماضى عدى وفات
ولا المـشكـلـة ويـَّا الدنـيا
انى كبرت..و قلبى صغير ؟؟

جَـرَّب

جَرَّب دَوَر فى رفوف قلبك
جَرَّب قَـلِـب فى البراويز
جَرَّب يوم تضحك من قلبك
و تعيشها من غير تبويز

جَرَّب مرة تعدى بحور
جَرَّب مرة تنط السور
اقفل مرة باب الدايرة
غمض عينك..و ابدأ دُوُر
و ما تـتـعـبـش

جَرَّب طير بجناح مفرود
اعلى و اعلى وانسى تعود
و اوعى تفكر ايه اللى جرالك
فكر بس انك موجود
و ما تـحـسـبـش

و انسى همومك
و انسى دموعك
و ازرع فرحة
جوه ضلوعك
و اما يقرب وقت رجوعك
اتشعلق فى نجوم السما
و ما تـفـلـتـش

نَــفَــــــس

طالع نفس
داخل نفس
و انت وحيد من غير ونَس
و فى وسط زحمة
عايش غريب
مهما تقرب
مش قريب
تضحك لده
و تحب ده
و تشوف فى ده
احسن صديق
ترسم سكك ملهاش عدد
و برضه ما تلاقى طريق
تغلط ساعات
و ساعات بـرئ
و ساعات جبان
و ساعات جرئ
و ساعات بتتعلق بقشة
و انت غريق
و تـتوه من قبل الطريق
ولا تلقى معاك حبيب
و لا صديق...
و تعيش فى حيرة و انتظار
و لما تـنوى الاختيار
ان مرة صابت
مليون تخيب
و تقول نصيب
و تعود كما الاول غريب
طالع نفس
داخل نفس
و لسه مش لاقى..الونس

كـان ياما كـان

كان ياما كان و كان ياما كان
كان فى مرة شعب اتهان
باعوا ارضه و سرقوا فلوسه
اصله يا عينى طيب غلبان
تلاتين سنة و الامن يدوسه
و التعذيب كان بالمجان
فــقــر..بــطالــة
اهانــة..عِمــالـة
و فساد من كل الالوان
لكن فجأة الشعب ده فاق
و اتحرك لما الحال ضاق
و نسى الطيبة و غُلب زمان
و رَجّع حقه فى الميدان
و كان ياما كان و كان ياما كان

كان فى جيش بيحمى الثورة
من اى مؤامرة و مناورة
هايحاكم اعداء الشعب
و يعدينا الوضع الصعب
و قراراته هاتبقى مشاورة
لاجل ما نحمى مكاسب الثورة

و هايضرب و بكل القوة
على ايد القلة المدسوسة
و هايقضى من بره و جوه
على كل الفتن المحبوسة
و هايمشى بخطة مدروسة
من اجل الديموقراطية
من اجل العزة و المجد
و كل الاحلام الوردية

و المطلوب بس اننا نهدى
و ندَور عجل الانتاج
و نسيبه يحكم بمزاج
احسن مانروح فى خبر كان
و كان ياما كان و كان ياما كان

كان فى ثورة ليها شهور
و التحقيق لساه بيدور
و الاحكام لسه ماصدرتش
و فلوس طلعت و مارجعتش
و الحق ماعادش لاصحابه
و الفتنة لسه ماماتتش
و ادى مسيحى مخاصم مسلم
و برئ اتحاكم مع مجرم
و اللى بيهدم لسه بيهدم
و كأن الثورة ماقامتش

و الشلة اياها..لساها
متأجلة احكام قضاياها
و ديولهم لسه بتخّرب
و فلوسهم لسه بتتهرب
و البراءات بدأت تتسرب
و احنا المطلوب مننا نسكت
و تهمهم كلها ننساها

و نرجع تانى زى زمان
شعب مسالم جدا..غلبان
ومانمشيش ورا اى مؤامرة
و يُفَضَّل ننسى انها ثورة
و نقول بالفم المليان
ياريت الامر ده ما كان
و كان ياما كان و كان ياما كان

رسالـة عبر الحدود

هذا الجــدار...ما عاد يجدى
هذا الحصار...ما عاد يجدى
ما عاد يجدى بطشكم او عنفـكم
ما عاد يسرى فى الدماء خوفكم
ما عاد يحكمُ ارضَنا
من يأتمر بأمركم
من كان يحنى الرأس
و ينكسُ الرايات
حين يذكر اسمكم...

يا اسرائيل
ما عاد من كان عليلاً...عليل
ما عاد من كان ذلـيلاً...ذلـيل
ما عدنا نتصالح عن الدماء
ما عدنا نرقب معجزات
تأتى لنا -بدون جهد- من السماء
ما عدنا بعد اليوم نكلمكم..عن استحياء
قد خلعنا اثواب المهانة للأبد
و ارتدينا الان اثواب الإباء

و لسوف نمسح عن غزة كل دموعها
و نـداوى جرحـاً غائـراً بين ضلوعها
سنُزيل عن القدس الفتية..خضوعها
و نجوب منتصرين ذات يوم
بـيـن ربـوعها...
و نصلى فجراً فى الاقصى الجليل
و نزين شوارع بيت لحم..بالأكاليل
و نزرع الورودَ والعهودَ
و نحطـم بـأيادينا القيـودَ
و نصالح النهار فى الخليل

انتظرنـا و انتظرنـا
ثم ثُرنا على طواغيت العروبة
و انتصرنــا
و استعدنا حريةَ..لأرضنا
و اقتصصنا لعرضنا
و اقتلعنا من فوق عروشنا..حكامَكم
تللك الدمى التى كانت تحركها اهوائَكم
لتقيدونا...
و تُضعِفوا الهمم..و تسيسونا
الان ما عدنا لكم مسيسين
ماعدنا ننسى ارضنا و جراحنا
و دماءنا التى سالت
فى طرقات فلسطين
الان ما عدنا مغيبين
فاحذروا...
و اعلموا بأننا..لن نرتضى ظلمَكم
و سندفع عن ارضنا طغيانَكم
و من اليوم..
لن يرعى حكامنا امنَكم
و لن نقبل سلمَكم
و لن نبيع قدسَنا
فاحذروا...و اعلموا بأنه
بالرغم من بطشِكم
فالأرض لنا
و لن تكون ابـداً لـكم

بــحــبــك....

يا سحرانى و اسرانى
بلا اسبـــاب
يا ساكنة فى روحى و كيانى
و قافلة البـــاب
يا ملــكــانـى....
و واخدانى من الدنيا
و فى الدنيا..
مفيش قبلك ولا بعدك
و قلبى يتوه فى ليل بُعدك
و يهرب من عينيا الضى
و ياخد كل عمرى الجاى
و مهما احاول اتوصف
ولا بلقى فى وصفك..زى

بحبك ياللى شغلانى
سوا فاكرانى..ناسيانى
و احبك لما تحتارى...
و احبك لما تختارى...
و احبك حب حيانى
و لو هتقولى رايدانى
فى غمضة عين
انا هاجيلك...
تشكيلى و اشكيلك
و اسيب شمسى تضويلك
و تحكيلك...عن الاشواق
و قلبى ازاى بقى مشتاق
لتوهة فى عينيكى السمر
و ضحكة جمالها لما يزيد
يقيد القلب كيف الجمر
و صوت دافى يرد الروح
يخلينى بسرى ابوح
وقلبى الفرحة فيه تحيا
و لو كان م الألم مدبوح
و فين ما بروح
اشيل صورتك فى ننى العين
يا اجمل حد شافته العين
و مهما تبعد المسافات
و مهما العمر عدى و فات
هاجيلك لو تكونى فين
اقيدلك قلبى عود و بخور
خطى عليه..ولا تخافى
و زيدى خطوتك..اتنين
و حاسبى من رموش العين
لتجرحنى...
و تدبحنى...
و انا رافع رايات قلبى..و مستسلم
و مهما تجرحى فيا..مــا بــتـألــم
ولا اتــنــدم...
على عشقى و ترحالى
و سهرى ليالى و ليالى
و حيرة امرى فى امرى
ولا اتندم على الاشواق
و لا ليالى فى بعاد و فراق
و لا اللى عدى من عمرى

و يعنى ازاى انا هاندم ؟؟
و انا من بين الوف و الوف...حـبـيـتـك
و بـقـيـتـك...
عن الدنيا و ما فيها
و صرتى كل ما فيها
و خليتى مرارها يهون
و ملكتينى كل الكون
و بإيديكى اتولد فرحى..
و مهما تزيدى فى جرحى
هتبقى فى قلبى اغنية
و قمرى فى قلب لياليا
و هافضل اقول..انا بحبك
يا اغلى و كل ما ليا

ميـن أنــا !؟؟

و بيسألونى مين انا ؟؟

و ازاى فى قلبى لسه الغُنا ؟؟

و ازاى فى عتمة الف ليل

شفت فى عينيكى كل المُنّا ؟؟



و نسيوا ان انا,,,

عاشق ترابك يا بهية

فى بطن امى و انا جنين

عاشقك بطرحة و جلابية

فى المغربية عند الحسين

عاشقك..بجوز عيون جُمال

بطمى نيلك متكحلين



نسيوا ان انا,,,

كنت بخبى فى ضحكتك

الدموع و يا الانين

و افدى بدمى دمعتك

و اديكى عمرى و السنين

انى كل ضحكة صافية

بانت فى يوم على شفتين

انى كل دمعة جارية

شقت طريقها على خدين

و انى كل كلمة بحبك

قالها عاشق م العاشقين

انى بيرم..و عم نجم

انى جـــاهين..



نسيوا اكيد...

انى كل بيت فى ارضك

و انى صاين ليكى عرضك

انى سنتك,,,انى فرضك

و انى لما تضحكى

ببقى فى عيد

و اجرى اغزلك بإيدى

توب جديد

لاجل ما تتباهى بيه..

فى وجه بحرى

و القاهرة...

و فى الصعيد..



و انى شهيد.....

لبيت نداكى يوم محنتك

و رويت بدمى..حريتك

و انا سعيد....



و لا كنت طالب جاه و مجد

و لا حتى شكر من اى حد

و كل حلمى..كان بس انى

و انا بموت قدام عينيكى

القاكى واقفة متبسمة

راضية..و مش متألمة

و امحى بإيدى حسرتك

و ازرع مكانها فرحتك

بيا و انا بلبى الندا

و انا بوهب عمرى فدا

لاجل ما تِحلى دنيتك...



و هاسيب انا دنيتى

و دمى شاهد على فرحتى

و اصرخ و اقول باعلى صوت

ادى يا ناس...قصتى



عشت هنا"

و ياما قاسيت

لكنى برضه

"مُت هنا



و لسه بعد كل ده

بيسألوا مين انا !؟؟

العيـــون الســود

مدى الخطاوى مدى

يام العيون السود

مدى ولا تهدى

قلبى طريق ممدود

خطى عليه بدلال

برمشك القَتًّال

قبلك ما شفت جمال

ولا زى عودك عود..

مدى الخطاوى مدى

يام العيون السود

...

مدى خطاويكى

قلبى و داب فيكى

روحى اهى ملكك

و دنيتى ليكى

...

مدى و زيدى الخطاوى

ياللى عنيكى غناوى

و ان كنتى مش عشقانى

قلبى ما غيرك غاوى

...

مدى ولا تهديش

وياكى بس بعيش

و لو تغيبى يوم

الدنيا مابتمشيش

...

مدى..الخطاوى كُتَار

و قلبى قايد نــار

و عشان ابطل احبك

محتاجلى مليون زار

...

مدى الخطاوى و عدى

و اول ما تيجى حدى

بصى على عيونى

هتلاقى فيهم ردى

...

فيكى كلامى احتار

و غنايا و الاشعار

زايد حلاكى سمار

وياكى...مين قدى؟؟

...

يام العيون السود

مدى الخطاوى مدى....

مـــــــلاك....

سألت ايه الاسم ؟؟

قالوا ملاك مش بشر

سألت ايه الرسم ؟؟

قالوا ده كيف القمر

عالى مابين النجوم

و معاه بيحلى السهر

و ادى القمر فى سماه

غيران اهه منك

اصله يادوب منتهااه

نقطة فى بحور حسنك

بحبك...

ياللى علمتى لساانى

ازاى يقول احلى الكلام

بحبك...

ياللى ساكنة بين ضلوعى

و بصحى على صورتك و انام

بحبك..

ضحكة سارحة جوه قلبى

بتحلى ايامى اللى جايه

بحبك..

نسمة مطلوقة فى صدرى

بتهون المر عليا..

بحبك..

و حبك لما سكن قلبى

حسسنى بأنى امير

و انى بطير

بلا جناحات

لكنى بطير

لا انا مسحور ولا ساحر

و لا مجنون ولا شاعر

انا عاشق

و دايب دوب

و عشقك عمرى عنه ماتوب

و لو مهما خدتنى دروب

هيفضل عشقى ليكى يزيد

و اقول و اعيد

بحبك..

و قلبى ليكى اسير

بحبك..

و مهما يصير

غرنـاطـة

" إبكِ مثل النساء ملكاً مضاعاً لم تحافظ عليه مثل الرجال "

كانت هذه كلمات الاميرة " عائشة الحرة " لابنها " ابى عبد الله محمد" اخر ملوك

الاندلس عندما سلم مفاتيح مدينة غرناطة -اخر معقل للاسلام بالاندلس- لجيوش الصليبين

كلمات كانت....ولا زالت....و ستظل خالدة !!!!

إبكِ كما تبكى النساء

ابدل دموعك بالدماء

قد اضعت الملك منك

و اليوم لا يجدى بكاء

فإبكِ كما تبكى النساء......

ودع الارض الحزينة

سلم مفاتيح المدينة

الآن قد حل المساء

فإبكِ كما تبكى النساء......

إبكِ شمساً باهرة

اطفئتها بيديك

و حبست الضياء

إبكِ لحناً اسرا

شوهته بيديك

و قتلت الغناء

إبكِ غرناطة الأبية

إبكِ أندلس الإباء

إبكِ...كما تبكى النساء

الآن.....

ماعدت ملكاً...

ماعدت رجلاً...

ماذا اقول للتاريخ

حين يسأل عن رجل

ارتدى..زى النساء ؟؟

تاه القصيد

و انتهى زمن الغناء

و انطفئ ضياء الشمس

فى كَبَد السماء

غرناطة يا رمز الإباء

سامحينى......

انجبت ولداً..كى يحمكى

كى يكون دفئك فى الشتاء

لكنه..ارتدى زى النساء

سَلَم مفاتيح المدينة

و جاءنى يبكى..

كما النساء

غرناطة يا رمز الإباء

سامحينى......

لم يبق بعد اليوم بين اسوارك

إلا النــــــســـاء...

الانتصــــار

سقط الرئيس
سقط الوريث
سقط الصنم
و بلدنا رجعت حرة
و الشعب رفع العلم
و النيل من فرحته
ميل و باس الهرم
و النخل ع الشطين
هلل و حضن المعابد
جرس الكنيسة دق
كبرت المساجد
سقط الرئيس
سقط الوريث
سقط النظام
و النور خرج
من بين ضلوع الظلام
و الحق خلاص
ماعدش تايه وسط الزحام
و الشعب لما انتفض
و قال كلمته
وقف الزمن
و ضربله تعظيم سلام
و سكت كل الكلام
و اتحققلنا الانتصار
و الحكاية باختصار
هى حكاية شعب ثار
شعب حاولوا يغموا عينه
و يكتموا فيه النهار
شعب حاولوا يسكتوه
و يخوفوه بحديد و نار
ياما ضربوه...عذبوه
لاجل ما يرضى بالانكسار
لاجل ما يرضى يبيع كرامته
و يعيش حياته وسط عار....
يموت لو فى يوم نطق
او يعيش زى فار
و كأنها عايزه اختيار !!!؟؟
نسيوا انه عاشق للبلد دى
لو مهما لف و مهما دار
و انه قادر لسه يضحك
لما تزيد محنته
و انه لسه مهما حاولوا
قادر يمد فى خطوته
و لسه فيه قوته
وانه لازم يوم يفوق
ينفض من على كتافه الغبار
يخَرج المجد بأيديه
من قلب الدمار
و وقتها لو مهما عملوا
مش هايرضى غير..
بالانتصار...
و ده اللى صار
لما الجموع اتجمعت
من كل حى وكل دار
لما هتفت الحناجر
من وسط دخان و نار
لما دم الشهدا سال
فى الميادين و الشوارع
م القنابل و الرصاص
و الخيول و الجمال..
لما الخوف اللى معشش
جوه قلب مصر زال
لما الشعب كله قال
ارحل عنا يا مبارك
و خد كمان فى ايديك جمال
ارحل بعيلتك و برجالك
ارحل خلاص الصبر طال
و احنا مللنا الانتظار
و مش هانسكت الا لما
يتحققلنا الانتصار
و ده اللى صار......

بـابـانويل

كان بابا نويل بيعدى الشارع
و محمل على كتفه الفرحة
و محمد قدام الجامع
كان ماشى وف ايده السبحة
و ادى جرجس بيكلم مينا
و بيضحك وياه و يهنى
بسنة جديدة هلة علينا
و الكل واقف ليها مستنى
و الوقت بيمشى بتأنى
فجأة..هز الشارع صوت
من عربية سايقها الموت
و اتقلبت كل الاحوال
و المشهد بقى مليان غم
و السبحة غرقها الدم
و جرجس مبقاش بيهنى
و مينا مبقاش مستنى
و بابا نوبل ليلة العيد
اتسرقت من قلبه الفرحة
بقى مرمى على جنب وحيد
و نزل اسمه
فى كشف الجرحى.....